Oilaviy qarzlar, fransuz adabiyoti, “tish raqsi” haqidagi hazillar va hatto tanqidchilardan hojatxonaga qochish voqeasi — Li Byon Xonning unutilmas xotiralari juda ko‘p.
Fransuz adabiyoti va kino
Li Byon Xon na bolaligida, na yoshligida aktyor bo‘lishni orzu qilgan. U bu haqda hatto o‘ylamagandi, aksincha o‘z hayotini fransuz adabiyoti bilan bog‘lashni rejalashtirgan.
Mutaxassislikni tanlayotganimda fransuzcha gapirsam, juda zo‘r bo‘lardi, deb o‘yladim. Bir yil shu bo‘yicha o‘qidim, keyin esa KBS kanaliga qabul qilishdi.
Kunlarning birida Li Byon Xon uyda dam olayotgandi. To‘satdan onasining tanishi KBS kanali uchun ariza namunasini olib keldi. Bo‘lajak aktyor odamlar oldida chiqishni yoqtirmasdi. Taklifni rad etmoqchi bo‘lganida onasining: “Shunchaki sinab ko‘r, tajriba orttirish uchun” degan so‘zlari uni to‘xtatdi.
Garchi dastlabki natijalar uni quvontirmagan bo‘lsa-da, yangi soha aktyorni o‘ziga jalb etdi. O‘sha paytda ketma-ket 3 ta muvaffaqiyatsiz loyiha inqirozni anglatadi, deb hisoblanardi: go‘yo aktyor bunday vaziyatda bosh rolni qayta ololmaydigandek.
To‘rtinchi filmim ham muvaffaqiyatsizlikka uchradi. Qizig‘i, men uch marta omadsizlikdan keyin to‘rtinchi film uchun imkoniyatni qo‘lga kiritgandim. Beshinchisi — “Yuragim parchasi” (1999) esa muvaffaqiyat qozondi.
Oilaviy qarzlar
Aktyor — oilaning to‘ng‘ich farzandi. Uning Li Ji An (avvalgi ismi Li Yn Xi) ismli singlisi bor, u 1996-yilda “Koreya go‘zali” unvonini qo‘lga kiritgan.
Aktyorning otasi 1998-yilda vafot etgan. U surunkali kasallikka chalingandi — chet elda ishlayotganida hushini yo‘qotgan, uni darhol topa olishmagan. Oqibatda kasalxonaga yetib borolmay, joni uzilgan.
Bizning qarzlarimiz bor edi. Ularni to‘lash uchun akam o‘zini masxara qiladigan reklama roliklarida suratga tushgan. O‘sha paytda u barcha qarzlarni to‘liq uzishga erishgan.
Sog‘lom tishlar raqsi
2007-yilda Yaponiyada muxlislar bilan uchrashuvda aktyor jo‘shqin raqs bilan chiqish qildi. Keyinchalik bu chiqish “건치 댄스” (sog‘lom, tekis, go‘zal tishlar raqsi) deb nom oldi.
Konsert prodyuseri“Jilmaymasang, qo‘rqinchili ko‘rinyapsan”, degan. Men butun raqs davomida tabassum bilan raqsga tushganman. Ammo robotga o‘xshab qolishimni sira o‘ylamagandim!
Uning raqsi memga aylandi. Li Byon Xon esa konsertdan so‘ng o‘zini videoda ko‘rgach, juda oqilona ish qildi: aktyor suratni ijtimoiy tarmoqdagi sahifasiga joyladi.
Odamlar baribir buni ko‘rishadi. Nima uchun buni o‘zim e’lon qilmasligim va hech bo‘lmaganda xushchaqchaq ko‘rinishga urinib ko‘rmasligim kerak ekan, deydi aktyor.
Hojatxonaga yashiringan
2001-yilda aktyor “Arqon bilan sakrash” filmida bosh rolni ijro etdi. Filmning dastlabki namoyishida kutilmagan hodisa sodir bo‘ldi.
Kulgili joyi yo‘q sahna namoyish qilinganda, to‘satdan 30 yoshli Li Byon Xon zaldan kulgi ovozini eshitib qoldi.
“Biz tamom bo‘ldik”, deb o‘yladim. Shuning uchun menejerimga: “Men hojatxonaga yashirinib turaman, hammasi o‘tib ketgandan so‘ng kelib, meni olib keting”, dedim.
Seans yakunlangach, menejer aktyorning oldiga kelib, hammaga film yoqqanini aytadi, ammo Li Byon Xon bunga ishonmaydi. Film haqidagi taqrizlarni o‘qigandagina, o‘shanda hayajonlanganidan kulgi ohangini ilg‘ay olmaganini tushunadi.
Shaxsiy agentlik
2006-yilda Li Byon Xon menejeri bilan birga BH Entertainment kompaniyasini tashkil qiladi. Kompaniyada BH homiyligi ostida Pak Bo Yon, Kim Go In, Pak Jin Yon, Xan Hyo Ju va boshqa aktyorlar faoliyat yuritadi.
2023-yil may oyida Li Byon Xonning kompaniyasi barcha aktyorlari uchun Vyetnamning Danang shahriga safar uyushtirdi. Bu bilan agentlik tashkil etilganining 17 yilligi nishonlandi. Barcha xodimlar va aktyorlarni bir joyga to‘plash oson kechmadi, shu bois tadbir 6 oy oldindan rejalashtirilgandi.
Iste’dodlar shousi paytida karaokeda qo‘shiq aytganimizda, barchamiz bir butun bo‘lib ketdik. Li Byon Xon hammamizga faxr bilan qarab turardi, deydi Pak Bo Yon.
Postlariga xotinining sharhlari
2013-yilda Li Byon Xon va Li Min Chjon turmush qurdi. Juftlikning ikkita farzandi bor, biroq er-xotin o‘rtasidagi munosabatlar doim ham silliq kechmagan. Aktyorning nikohdan tashqari munosabatlari bo‘lgan, ammo u xotini bilan ajrashib ketmadi. Ayoli uni kechirdi, hatto ijtimoiy tarmoq foydalanuvchilari unga qarshi chiqishganda ham, erini himoya qildi.
Gollivuddagi ishi
2013-yilda Li Byon Xon “Kobra hamlasi 2” filmida ilk bor rol ijro etdi. Suratga olish paytida aktyorni “shahzoda” deb atashardi, u kamgap bo‘lib, deyarli hech kim bilan muloqot qilmasdi. Aktyor ingliz tilida gapirishga qiynalardi.
Men sodir bo‘layotgan voqealarning ko‘pini tushunolmasdim, deydi aktyor.
Li Byon Xon Bryus Uillis bilan ikkita filmda birga ishlagan: “Kobra hamlasi 2” va “RED 2”. Ularning munosabatlari yaxshi, chunki Bryus Uillis Li Byon Xonga juda g‘amxo‘rlik qilgan.
Qiziqarli fakt: “RED 2” filmidagi bosh qahramonlar yirik planda tasvirlanayotgan sahnada, Bryus Uillis rejissyordan Li Byon Xonni ham yirik planda olishini so‘ragan.
Li Byon Xon — paradoksal shaxs. U jamoat oldida chiqishlarni xushlamaydi, ammo koreys kinosining yuziga aylandi. Fransuz adabiyoti haqida o‘ylardi, biroq o‘zini Gollivudda namoyon etdi. Uning hayoti mukammal karyera haqida emas, balki qanday qilib yiqilishlar, ko‘z yoshlari ortidan kulgi va hatto bema’ni raqslar ham muvaffaqiyatga erishish uchun pog‘ona bo‘lishi mumkinligi haqida.
Izoh (0)