АҚШ ҳарбий-ҳаво кучларининг қирувчи самолётлари Аляскага яқинлашаётган Россия президенти Владимир Путиннинг бортини ҳимоя қилади. Бу ҳақда Newsweek нашрига Канада ҳарбий-ҳаво кучларининг истеъфодаги генерал майори Скотт Кленси маълум қилди.
“Шимолий Американи ҳарбий босқинлардан ҳимоя қилиш учун ишлатиладиган воситалар, Россия бу йил уч марта шундай босқин қилган, бўлажак саммитда Россия президентини ҳимоя қилиш учун қўлланилади”, дея таъкидлади у.
Кленси, бу “тақдирнинг қизиқ ҳазили” эканлигини қўшимча қилган.
Собиқ зобитнинг айтишича, Аляскада АҚШнинг иккита йирик авиабазаси - Путин келиши кутилаётган Элмендорф-Ричардсон ва Фербенкс мавжуд. Уларда бошқа самолётлар қаторида бешинчи авлод F-22 ва F-35 қирувчи самолётлари ҳам бор.
Нашрнинг таъкидлашича, Россиянинг Су-57 ва Американинг F-22 Raptor қирувчи самолётлари Россия ва АҚШ президентлари саммити муносабати билан биринчи марта бир ҳаво ҳудудида учрашиши мумкин.
Аниқлаштирилишича, агар Су-57 самолётлари Аляскага йўл олган Россия раҳбарининг самолётига ҳамроҳлик қилса, бундай учрашув содир бўлиши мумкин. Қайд этилишича, бир нечта F-22 самолётлари Путин ва АҚШ президенти Дональд Трамп учрашуви режалаштирилган Элмендорф-Ричардсон ҳарбий базасида жойлашган.
15 август куни Путин ва Трамп Аляскада музокара ўтказади. Асосий мавзу - Украинадаги тинчлик. Учрашув Тошкент вақти билан соат 00:00 да бошланиб, яккама-якка суҳбат билан давом этади. Муҳокама қилиниши мумкин бўлган таклифлар орасида ҳудудларни алмашиш ва Киевнинг НАТОга аъзо бўлишдан воз кечиши бор. Учрашувда Россия ва АҚШ ўртасидаги иқтисодий ҳамкорлик масалалари ҳам кўриб чиқилади.
Изоҳ (0)