Ўзбекистонда туғилган корейс актёри: “Биз барчамиз ўликмиз” сериали юлдузи Пак Соломон ҳақида нималар маълум?

Жанубий Кореянинг 2022 йилги машҳур “Биз барчамиз ўликмиз” дромасидаги келишган йигит — ёш юлдуз Пак Соломон ҳақида эшитганмисиз? У аллақачон кўплаб томошабинлар қалбидан жой олишга муваффақ бўлган.

Ўзбекистон ва Россия

Пак Соломон 1999 йил 11 ноябрда Ўзбекистонда туғилган. Унинг оиласи этник корейс. Уларнинг айтишича, Соломоннинг оиласи Россияда ҳам бир мунча вақт яшаган, аммо қанча вақтлиги номаълум.

Болакай 12 ёшида оиласи билан Жанубий Кореяга кўчиб кетган. У ерда мактабни тамомлаб, корейс маданияти ва таълимини ўрганган.

Соломон суҳбатларидан бирида шундай деб эслайди: “Ҳа, мен Ўзбекистонда туғилганман. Менинг оилам корейс, мен ҳам корейсман. Аммо Кореяда ўзимни ҳеч қачон кўп миллатли муҳитнинг бир қисмидек ҳис қилмаганман”.

Актёр корейс ва рус тилларида эркин гаплашади. Интервьюларда ва ижтимоий тармоқларда рус тилини яхши билишини намойиш этган. Кўпчилик акторнинг сеҳрли овоз соҳиби эканини таъкидлайди, айниқса, у рус тилида гапирганда.

Актёрнинг исми қандай маънога эга?

Пак Соломон исми оилавий тарих ва ота-онасининг умидлари билан боғлиқ. Отаси уни доно ва фикрловчи инсон бўлишини истаган.

“Отам Муқаддас китобни ўқиб, доно яшашимни истаб, менга бу исмни танлаган экан. Исмимга муносиб бўлишга бор кучим билан ҳаракат қиламан. Донолик билан яшашга интиляпман”.

Муқаддас китобда Сулаймон ўзининг донолиги ва мураккаб қарорлар қабул қила олиш қобилияти билан танилган Исроил подшоси сифатида тасвирланган. Эҳтимол, Соломоннинг отаси ўғли ҳам шундай фазилатларни ўзлаштириши ва соғлом фикр ҳамда эзгу ниятлар билан яшашга интилишини умид қилгандир.

Исмнинг саҳнадаги образи учун Ломон тарзида мослаштирилиши уни халқаро томошабинлар учун янада эсда қоларли қилди.

Карьераси

Пак Соломон анча вақтгача поп-ижрочи бўлишни хоҳлайди. Унинг баланд бўйи (183 см) ва ёрқин ташқи кўриниши бу орзуни амалга ошириш учун жуда яхши имкониятлар яратарди. Аммо ота-онаси билан ўйлаб кўрганидан сўнг, у ўзи учун кутилмаган қарорни қабул қилади: актёрлик маҳорати курсларига ёзилади. Кейинчалик Соломон бир неча бор айтганидек, бу унинг ҳаётидаги энг яхши қарорлардан бири бўлган.

Пак Соломон илк марта экранда 2014 йилда “Аср келини” ва “Афсонавий жодугар” каби дорамаларда роллари билан кўриниш беради. Аммо актёрликка ҳақиқий қизиқиши 2017 йилда “Қўриқчи” сериали чиққандан кейин пайдо бўлади. Унинг ўрта мактаб қотили сифатидаги роли жиддий синов бўлиб, Соломоннинг ўзи бу лойиҳани карьерасидаги муҳим ютуқ деб ҳисоблайди ва ижодкорларга берилган имконият учун миннатдорлик билдиради.

Оламшумул машҳурлик

Соломон Netflixнинг “Биз барчамиз ўликмиз” зомби-дорамасида Ли Су Хёк ролини ижро этади — лойиҳа бутун дунё бўйлаб машҳур бўлади. Сюжет зомби-апокалипсиси пайтида ўз мактабида тузоққа тушиб қолган бир гуруҳ ўқувчилар атрофида қурилган бўлиб, Ли Су Хёк тезда томошабинларнинг энг севимли қаҳрамонларидан бирига айланади. Унинг совуққонлиги, жасорати ва яхшилиги уни шундай қаҳрамонга айлантиради.

Сериал эфирга узатилгач, Ломоннинг машҳурлиги кескин ошади. Бир ҳафта ичида унинг Instagram аккаунти 2 миллион обуначига кўпаяди. Бу унинг фақат битта лойиҳа актёри эмаслигини исботлайди — унинг харизмаси Жанубий Кореядан ташқарида ҳам томошабинларнинг қалбини забт этади. Ломон учун бу шунчаки муваффақият эмас, балки жаҳон саҳнасида ҳақиқий эътироф эди.

Янги дорамалар

“Брендинг Sonsу-дон” (24 қисм, ҳар бири 26 дақиқа)

Ушбу романтик триллер марказида — маркетинг бўлимининг жаҳлдор раҳбари Канг На Ён ва стажёр Со Ин Хо ўртасидаги қарама-қаршилик туради.

Со Ин Хо (Ломон) — катта стажёр, жозибали ва ЁЛО (бир марта яшаймиз) принципига асосланиб яшайдиган ёш йигит. Кутилмаганда у ўз ўрнини топиб, агентликда стажировка бошлайди ва раҳбари бўлган қиз билан доим тўқнаш келади.

Канг На Ён (Ким Жи Ин) — ёш маркетинг афсонаси, ўзининг меҳнатсеварлиги ва муваффақиятлари билан танилган. Карьераси учун у шахсий ҳаёти ва муносабатларини ҳам қурбон қилолади.

“Оилавий режа” (6 қисм, ҳар бири 50 дақиқа)

“Оилавий режа” — бу оддий оилавий дорама эмас. У ўзига хос қобилиятларга эга бўлган бир гуруҳ одамлар ҳақида, улар бирлашиб, ўзларини бир оила қилиб кўрсатишади. Уларнинг миссияси — жиддий хавф туғдирадиган жиноятчилардан ўзларини ҳимоя қилиш. Пак Соломон 17 ёшли, меҳрибон ва самимий йигит ролини ижро этади.

Пак Соломон ҳақида қизиқарли фактлар

• Пак Соломон интервьюларда ўзини “Ўзбекистондан келган Ломон” деб таништиради. У ўзига хос ҳаёт йўли билан ёш актёрлар орасида ажралиб туради.
• Актёрлик карьерасидан ташқари, Ломон — афсонавий эркаклар поп-гуруҳи БИГБАНГнинг садоқатли фанати. 2016 йилда у ҳатто махсус Макао (Хитой)га бориб, уларнинг концертида иштирок этган.
• “Биз барчамиз ўликмиз” сериалининг суратга олиш жараёни актёр учун ҳиссий жиҳатдан жуда оғир бўлган. Бир саҳна уни шунчалик таъсирлантирадики, у кўз ёшларини тўхта олмайди.
• Ломон мухлисларининг айтишларича, унинг меҳнатсеварлиги, мақсадга интилиши ва доимий ривожланишга бўлган истаги корейс киносида узоқ ва муваффақиятли карьера қуриш учун мустаҳкам асос бўлади.