Корея шоу-бизнесида Сон Хе Гё энг талабгир актриса ҳисобланади. У ватанидан ташқарида ҳам шуҳрат қозонган. Унинг иштирокидаги кўплаб драмалар нуфузли мукофотларга сазовор бўлган. Юлдузнинг таржимайи ҳоли, шахсий ҳаёти ва карьерасидаги ютуқлари ҳақида маълумот берамиз.
Таржимайи ҳоли ва шахсий ҳаёти
Актриса 1981 йил 22 ноябрда туғилган. Аммо унинг туғилганлик тўғрисидаги гувоҳномасида бошқа сана — 1982 йил 26 февраль кўрсатилган. Чунки Сон туғилганда шифокорлар унинг тирик қолмаслигига ишончлари комил бўлган. Бироқ уч ойлик даволанишда сўнг қизалоқ тузалиб кетади. Шундан кейингина ота-онаси янги туғилган чақалоқни рўйхатга олишади.
Шуҳрат сари йўл
Сон Хе Гёнинг отаси ва онаси у ҳали ёшлигида ажрашишган. Онаси қизи билан Сеулга келиб, Каннам туманига жойлашади. 1980 йилларда бу ерга кўплаб нуфузли мактаблар кўчиб ўтганди. Сонг Хе Гё улардан бири — Эwҳа қизлар ўрта мактабига қабул қилинади.
Tatler Аsia нашрига кўра, у болалигида фигурали учувчи бўлишни орзу қилган, ҳатто мазкур спорт билан шуғулланишни бошлаган. 1996 йилда 14 ёшли Сон танловда ғолиб чиққач, мактаб формаси моделига айланганида ҳаммаси ўзгариб кетади. У эътиборга тушади ва “Биринчи севги” (1996-1997) драмасида кичик рол ўйнашга таклиф қилинади. Шундан кейин бошқа фильмларда ҳам иштирок этади, шу билан бирга Сон Хе Гё Сежонг университетида ўқишни давом эттириб, кино санъати бўйича диплом олади.
Шахсий ҳаёти
Машҳур кореялик актрисанинг шахсий ҳаёти ва турмуш ўртоғи кимлиги ҳар доим мухлислар ва журналистларда қизиқиш уйғотади. South China Morning Post Сон Хе Гёнинг муносабатлари бўлган деб тахмин қилинган эркакларни санаб ўтган. Аммо актриса фақат учта эркак билан бўлган муносабатларини расман тасдиқлаган. Булар:
Ли Бён Хон. Сон ва Ли учрашиб юрганларини очиқ тан олишади. 11 йиллик ёш фарқи ва Лининг оғир феъл-атворига қарамай, муносабатлар 2003 йилдан 2004 йилгача давом этган.
Хён Бин. Расмий равишда тасдиқланган Сон ва Хён ўртасидаги яқин муносабатлар 2008 йилдан 2011 йилгача давом этган. Хён армияга чақирилгандан кейин ҳаммаси тугаган.
Сон Чжун Ки. 2016 йилда у Сон Хе Гё билан учрашиб юради. Жуфтлик бир йил давомида муносабатларни яширган бўлса-да, дабдабали тўй қилиб мухлисларни ҳайратда қолдиради. Аммо мазкур никоҳ икки йилдан камроқ давом этади, 2019 йилда эр-хотин ажрашганликларини эълон қилишади. Ўшанда кўплаб ОАВлар ажралиш сабабини характерлардаги фарқ деб атаганини ёзган эди.
2023 йил бошидан бери Сон Хе Гё идол ва актёр Ча Ин У билан учрашаётгани ҳақида миш-мишлар тарқалган. Бу тахминга YouTube'да эълон қилинган шубҳали видео сабаб бўлган. Аммо КDramaStars ва КBIZoom бу миш-мишларни рад этган.
Карьераси
Ўйнаган роллари актрисага оламшумул шуҳрат ва кўплаб мукофотларни олиб келган. Соннинг энг яхши картиналари орасида Жон Вунинг “Тажовуз” (2014) тарихий мелодрамаси ҳам бор. Бу фильм бешта мукофотга сазовор бўлган, шу жумладан Hong Kong Film Awards'га ҳам. Сооmpi нашрининг ёзишича, мазкур фильм Хитойда касса йиғимлари бўйича етакчига айланган.
Сон Хе Гё қайси фильмларда суратга тушган?
Соомпи нашри Сон Хе Гё иштирок этган билан энг яхши сериалларни санаб ўтади. Улар қаторига қуйидаги лойиҳалар киради:
“Куз эртаги” (2000). Сон Хе Гё бу дорамада Юн Ин Со ролини ўйнайди, у асраб олинган қиз эканини билиб қолади. У ҳақиқий онасининг олдига қайтиш учун ўгай акаси Юн Чжун Со (Сон Син Хон)дан ажралишига тўғри келади. Йиллар ўтгач, улар учрашишади ва бир-бирларини севиб қолишади.
“Меҳмонхона” (2001). Сериалда Сеулдаги меҳмонхона ҳақида ҳикоя қилинади, бош директор ўлимидан кейин унинг беваси мазкур меҳмонхонани сақлаб қолишга ҳаракат қилади. Сон Хе Гё меҳмонхонани эгаллашга уринаётган Ким Бокманнинг (Хан Жин Хи) қизи Ким Юн Хи ролини ўйнайди.
“Ва-банк” (2003). Профессионал қиморбоз Ким Ин Ха (Ли Бен Хон) Мин Су Енга (Сон Хе Гё) ошиқ бўлиб қолади. У Мин Су Ен отасининг ўлимида айбдор бўлган жиноятчини ўлдирганидан кейин қамоққа тушади. Етти йилдан кейин тақдир уларга қайта бирга бўлиш имкониятини беради.
“Тўлиқ уй” (2004). Сон Хе Гё ва Чон Жи Хун турли характердаги ёшларни ўйнайди. Улар ўзлари истамаган ҳолда бир том остида яшашга мажбур бўлишади. Аста-секин нафрат ҳақиқий муҳаббатга айланади.
“Бу қишда шамол эсади” (2013). Ёмон йигит О Су (Чо Ин Сон) кўзи ожиз қиз О Ёнга (Сон Хе Гё) ошиқ бўлиб қолиши ҳақидаги романтик драма. Гарчи улар бир-биридан жуда фарқ қилса-да, бир-бирига бўлган кучли эҳтиёж қаҳрамонларни муҳаббат сари етаклайди.
“Қуёш авлодлари” (2016). Бу армия капитани (Сон Чжун KИана) ва шифокор (Сон Хе Гё) ўртасида юзага келган севги ҳикоясидир.
Ҳозиргача Сон Хе Гё 26 та сериал ва 11 та фильмда рол ўйнаган. У еттита телекўрсатувда иштирок этган ва учта мусиқий клипда суратга тушган.
Ҳозирда нималар билан банд?
Сон Хе Гё фаол рол ўйнашда давом этмоқда. Деярли ҳар йили унинг иштирокида янги дорама чиқади. Актрисанинг энг янги лойиҳалари орасида иккита сериални эслатиб ўтиш керак:
“Энди хайрлашамиз” (2021-2022). Сон Хе Гё шуҳратпараст дизайнер Ха Ён Ин ролини ўйнайди. У брендни дунёга танитмоқчи ва фақат иш ҳақида ўйлайди. Чан Ки Ёнг машҳур фотограф Юн Чже Гук ролини ижро этади. Улар ўртасида пайдо бўлган севги-муҳаббат оғир ажралиш билан тугайди, аммо тақдир ҳамма нарсани ўзгартириш имкониятини беради.
“Шон-шараф” сериали 2022 йилда Netflix'да чиқди ва Сон Хе Гёнинг энг яхши лойиҳаларидан бирига айланди. У юқори мактабда шафқатсиз зўравонликка учраган Дон Ин ролини ўйнайди. Вояга етган аёл қасос олишни истайди.
Ушбу икки лойиҳа юлдуз карьерасидаги охиргиси эмас албатта. Сон Хе Гё корейс киносининг жонли афсонасига айланди. Унинг ҳар бир қадамини миллионлаб мухлислар кузатиб боради. Улар юлдуз иштирокидаги дорама ва фильмларни сабрсизлик билан кутишади.
Изоҳ (0)