Россияга қарши санкциялар Марказий Осиё мамлакатларининг иқтисодиётига зарар етказаётган бўлса-да, уларни бу минтақа орқали четлаб ўтишига йўл қўйиб бўлмайди. Европа иттифоқининг ташқи ишлар ва хавфсизлик сиёсати бўйича олий вакили Кая Каллас журналистлар билан учрашувда шундай фикрни билдирди.
“Европа иттифоқи Россия ҳарбий машинасини издан чиқариш учун 16 та санкциялар пакетини жорий этди ва биз 17-пакет устида ишламоқдамиз. Шу боис, мен санкцияларимизни четлаб ўтишга, жумладан, Марказий Осиё орқали қарши курашиш муҳимлигини ҳам таъкидладим. Бу санкциялар иқтисодиётингизга зарар етказаётганини тушунаман, бироқ ҳаммамиз бу урушнинг тугашини исташимиз аниқ. Россия компанияларининг санкцияларни четлаб ўтиш учун Марказий Осиёга мурожаат қилишига йўл қўймаслигимиз керак”, деди у.
27 март куни Ашхободда Қозоғистон, Қирғизистон, Тожикистон, Туркманистон ва Ўзбекистон иштирокида “Европа иттифоқи—Марказий Осиё” 20-вазирлар учрашуви бўлиб ўтди.
Унда иштирокчилар 3-4 апрель кунлари Самарқандда ўтказиладиган Европа иттифоқи—Марказий Осиё биринчи саммитига тайёргарлик масалаларини муҳокама қилдилар.
Бундан ташқари, йиғилиш кун тартибига Украинадаги можаро, транспорт ва рақамли алоқа, хом ашё, энергетика ва сув, савдо, одамлар ўртасидаги алоқалар, таълим ва тадқиқотлар масалалари киритилган.
Изоҳ (0)