Германия ЕИнинг Россияга қарши янги санкцияларини блокламоқда

Германия ҳукумати Россияга нисбатан санкцияларни четлаб ўтишни қийинлаштиришга қаратилган жазо чораларининг қабул қилинишига қарши чиқмоқда, дея Deutsche Welle хабар берди.

Хабарга кўра, санкциялар G7 саммити бошланишига қадар тасдиқланиши керак эди. Янги пакет Россия-Украина уруши сабабли Москвага нисбатан жорий қилинган мавжуд чекловларни четлаб ўтишга йўл қўймаслик учун ишлаб чиқилган.

DPA суҳбатдошларига кўра, Германиянинг иккиланиши ва ҳужжат матнига ўзгартириш киритиш ҳақидаги илтимослари Россияга қарши сўнгги санкциялар пакетини кечиктиришнинг ҳал қилувчи омилидир.

Сўнгги пайтларда Германия — янги Венгрия, деган ўйлар пайдо бўлди, яъни Виктор Орбан ҳукумати Россияга қарши Европа санкцияларини қабул қилиш ва Украинага ёрдам кўрсатишни бир неча бор тўсиб қўйган эди, — деди ЕИ дипломатларидан бири.

Германиянинг ЕИдаги доимий ваколатхонаси вакили музокаралар махфий ўтганини айтиб, тафсилотлар ҳақида изоҳ беришдан бош тортган.

Нашр суҳбатдошларига кўра, Берлин асосан Россияга қарши мавжуд санкцияларни четлаб ўтишни мураккаблаштиришга қаратилган чора-тадбирларга  тўсқинлик қилмоқда.

Германия айрим товарларга нисбатан санкциялар бузилган тақдирда шўба корхоналарни жавобгарликка тортиш тўғрисидаги бандни чеклаш ёки ҳатто йўқ қилишга чақирмоқда, акс ҳолда немис компаниялари жавобгарликка тортилиши мумкин, — дейилади хабарда.