Украина илк бор “Узун Нептун” деб аталувчи Р-360 “Нептун” қанотли ракетасининг узоқ масофали модификациясини оммага тақдим этди. Бу ҳақда Defence Express хабар берди.

Мазкур ракета 1000 километргача бўлган масофадаги нишонларга зарба бера олади. Гарчи унинг ишлаб чиқилгани ҳақида илк бор 2023 йил ноябрида хабар берилган бўлса-да, ҳеч қандай тасвири эълон қилинмаган эди. Энди эса ракета илк бор 24 август — Мустақиллик куни муносабати билан “Зброя” давлат портали орқали намойиш қилинди.
Видеолавҳада “Нептун” Украинада ишлаб чиқилган бошқа қурол-яроғ намуналари билан бирга кўрсатилган. Бироқ унда ракетанинг аниқ номи ошкор қилинмаган. Кадрларда “Узун Нептун”ни ўзига хос йиғиладиган Х-шаклдаги қанотлари орқали таниб олиш мумкин.
Ракетанинг учирилиши акс этган кадрлардан айримлари эса архивий бўлиб, улар 2018–2020 йилларда ўтказилган синовларга тааллуқлидир. Дастлабки ҳисоб-китобларга кўра, янги ракетанинг узунлиги 6 метрдан ортиқ (тезлаткичсиз) бўлиб, бу биринчи версия — Р-360 дан қарийб 1,5 метр узунроқдир.
Шунингдек, корпуснинг марказий қисми ҳам кенгайтирилган: базавий модификациядаги 38 сантиметр ўрнига диаметри 50 сантиметрга етказилган. Янги ракета нафақат узунроқ, балки оғирроқ ҳам бўлиб, бу, эҳтимол, ёнилғи ҳажмини ошириш зарурати билан боғлиқ. Ҳозирча ракетанинг расмий техник хусусиятлари эълон қилинмаган. Маълум бўлган ягона жиҳат — у ер усти нишонларини йўқ қилиш учун мўлжалланган.
Изоҳ (0)