Европа иттифоқи ташқи ишлар вазирлари Суриядан санкцияларни олиб ташлаш бўйича йўл харитасини келишиб олди. Бу ҳақда Европа дипломатияси раҳбари Кая Каллас маълум қилди.
Каллас Евроиттифоқ санкцияларни олиб ташлаш масаласида “тезкор ҳаракат қилишга интилаётганини” айтди. Бироқ Сурия расмийлари “нотўғри қадамлар ташласа”, қарор қайта кўриб чиқилиши мумкин. Каллас биринчи навбатда қандай санкциялар олиб ташланишига аниқлик киритмади.
Манбалар, авиакомпаниялар, жумладан, Syrian Arab Airlines авиакомпаниясига нисбатан чекловлар ва нефть экспортига тақиқ қайта кўриб чиқилишини айтмоқда.
Европа иттифоқи Сурияга қарши санкцияларни 2012 йилда, Башар Асад режими ва исёнчи гуруҳлар ўртасидаги қарама-қаршилик кенг кўламли фуқаролар урушига айланганидан кўп ўтмай жорий қила бошлади. Санкциялар, асосан, ҳукумат ва ҳарбий тузилмаларга қарши жорий этилган. Улар Суриянинг Европадаги активларини музлатишни, шунингдек, инвестициялар ва нефть сотиб олишни чеклашни ўз ичига олади.
Суриядаги вазият
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди. 10 декабрь куни Идлиб шаҳрида исёнчиларга раҳбарлик қилган Муҳаммад ал-Башир ўзини Суриянинг ўтиш даври ҳукумати раҳбари этиб тайинлади. У фуқароларга қарата қилган телевидениэ мурожаатида бу лавозимни камида 2025 йил 1 мартгача эгаллаб туришини маълум қилди.
Изоҳ (0)