Эрон олий раҳнамоси Оятуллоҳ Али Хоманаий АҚШ Эронни ўзига бўйсундиришни истаётганини таъкидлаб, эронликлар бундай оғир ҳақоратга қарши бор кучи билан қаршилик кўрсатишини маълум қилди. Бу ҳақда Al Jazeera хабар берди.

Али Хоманаийнинг тегишли баёноти ҳақида давлат телевидениеси 24 август куни хабар берган.
“АҚШ Эронни мамлакатга бўйсунишини хоҳлайди. Аммо эронликлар бундай ҳақоратга бор кучи билан қаршилик кўрсатади. Биздан АҚШга қарши салбий фикрлар билдирмасликни ва улар билан тўғридан тўғри музокара қилишни талаб қилаётганлар вазиятга юзаки муносабат билдирмоқда. Бу муаммони ҳал этиб бўлмайди”, деди Хоманаий диний тадбирлардан бирида.
Хоманаийнинг ушбу баёноти Эрон ва Европа давлатлари 22 август куни ядро дастури юзасидан тўхтаб қолган музокараларни қайта бошлашга келишиб олганидан сўнг янграган. Франция, Германия ва Буюк Британия Теҳрон музокараларга қайтмаса, БМТ санкцияларини тезкор равишда тиклашга тайёрлигини билдирган.
Маълумот учун, Теҳрон Эрон-Исроил ўртасида бўлиб ўтган 12 кунлик урушда мамлакатнинг ядро объектларига уюштирилган ҳужумлардан сўнг, АҚШ билан ядро музокараларини тўхтатиб қўйган эди.
“Душман учун олдинга йўл — Эронда ихтилоф вужудга келтириш. Америкалик агентлар ва сионистик режим бу ишда айбдор саналади”, деди олий раҳнамо.
Ғарб давлатлари, жумладан АҚШ, Эронни ядровий қурол яратишга уринаётганликда айбламоқда. Бироқ Теҳрон бу дастур фақат тинч мақсадларда олиб борилаётганини таъкидлаб келади.
Маълумот ўрнида, Эрон 2015 йилда АҚШ ва бир қатор Европа давлатлари билан йирик ядровий битим имзолаган эди. Унга кўра, Эрон ўз ядровий фаолиятини чеклаш эвазига халқаро санкциялардан халос бўлиши лозим эди. Аммо Қўшма Штатлар президенти Дональд Трамп 2018 йилда ушбу битимдан чиқиб, Теҳронга янги санкциялар жорий қилган эди. Эрон ва АҚШ ўртасида 2025 йилнинг июнь ойида бўлиши керак бўлган олтинчи раунд ядро музокаралари айнан юқоридаги 12 кунлик уруш туфайли бекор бўлган.
Изоҳ (0)