Европа иттифоқининг Ташқи ишлар ва хавфсизлик сиёсати бўйича олий вакили, Европа комиссияси вице-президенти Кая Каллас Ўзбекистонга ташриф буюради.
Евроиттифоқнинг Ўзбекистондаги делегацияси маълум қилишича, дастлаб, у 27 март куни Туркманистонга ташриф буюради ва Ашхободда бўлиб ўтадиган йигирманчи “Марказий Осиё—Европа иттифоқи” вазирлар учрашувига раислик қилади.
Сўнг Тошкентга ташриф буюриб, Ўзбекистон ташқи ишлар вазири Бахтиёр Саидов ва президент Шавкат Мирзиёев билан учрашади.
Ундан кейин Кая Каллас Қозоғистондаги Олмаотага йўл олади ва у ерда 28 март куни Қозоғистон ташқи ишлар вазири Мурат Нуртлеу билан учрашади. Қозоғистон президенти Қосим-Жўмарт Тўқаев билан икки томонлама учрашуви ҳам режалаштирилган.
17 март куни Ўзбекистонга Европа иттифоқининг халқаро ҳамкорлик бўйича комиссари Йозеф Сикела ташриф буюрганди. Ташриф давомида у ТИВ раҳбари Бахтиёр Саидов билан учрашди. Унда Ўзбекистон ва Европа иттифоқи муносабатларини янада мустаҳкамлаш йўлларини ўрганиб чиқиб, иқтисодий ҳамкорлик, сармоявий ва минтақавий барқарорликка катта эътибор қаратилди.
18 март куни Сикела Шавкат Мирзиёев қабулида бўлди. Ўзбекистон билан Европа иттифоқи ўртасидаги кўп қиррали муносабатларни янада ривожлантиришнинг долзарб масалалари муҳокама қилинди. Учрашувда жорий йил апрель ойи бошида Самарқанд шаҳрида “Марказий Осиё—Европа иттифоқи” биринчи саммити ва Иқлим форумини ташкил этиш ва ўтказиш жиҳатлари ҳам кўриб чиқилди.
Ташриф давомида Ўзбекистон Европа иттифоқи томонидан молиялаштириладиган телекоммуникация соҳасидаги икки стратегик лойиҳа бўйича келишувларга эришди.
“Марказий Осиё—Европа иттифоқи” саммити ҳақида
Ушбу саммит 2025 йил 3—4 апрель кунлари Самарқанд шаҳрида бўлиб ўтади. Тадбирда Еврокенгаш ва Европа комиссияси президентлари Антониу Кошта ва Урсула фон дер Ляйен иштирок этади. Қозоғистон, Қирғизистон, Тожикистон ва Туркманистон раҳбарлари иштирокидаги саммитга президент Шавкат Мирзиёев раислик қилади.
Изоҳ (0)