Си Цзиньпин балиқ ҳақидаги нақл билан Украинадаги низони ҳал қилиш йўлларини баҳолади

Украинадаги низони сиёсий йўл билан ҳал қилиш барча Европа ва Осиё мамлакатлари манфаатларига энг кўп мос келади, деди Хитой раҳбари Си Цзиньпин Еврокенгаш раиси Шарл Мишел билан музокараларда. Бу ҳақда Хитой марказий телевидениеси хабар берди.

Унинг таъкидлашича, Хитой бу масала бўйича принципиал позицияни эгаллайди, мамлакатда эса «Шаҳар дарвозаси ёнидаги ёнғин кўлдаги балиққа бало келтиради» деган эски нақл тарқалган.

Си Цзиньпин инқироз кучайишига йўл қўймаслик, тинчлик ўрнатилишида қатъий туриш ва музокараларга кўмаклашишга чақирди. Инқирознинг иккиламчи таъсирларини назорат қилиш ва юзага келаётган хавфларга нисбатан огоҳ бўлиш зарур, деди у. ХХР раиси Евроиттифоқ Европада хавфсизликнинг мувозанатлашган, самарали ва мустаҳкам архитектурасини яратишга раҳбарлик қилиш орқали ўз воситачилигини ошираётганини Пекин қўллаб-қувватлашини айтди. Хитой доим тинчлик томонида турган ва конструктив рол ўйнашни ўзича давом эттиради, дея таъкидлади у.

Хитой ва Евроиттифоқ ўртасида принципиал стратегик келишмовчиликлар ва зиддиятлар йўқ, Пекин гегемонияга интилмайди, дея ишонтирди Си Цзиньпин. У Европа мамлакатлари «мафкуравий зиддият»ни енгиб ўтиб, «янги совуқ уруш»нинг барча шаклларига қарши туришига умид билдирди.

Ноябрь ўрталарида Си Цзиньпин Франция президенти Эммануэль Макрон билан биргаликда Украинада ўт очиш тўхтатилиб, музокаралар қайта бошланишини ёқлаб чиқди. Макрон ундан «саъй-ҳаракатларни бирлаштириб», Россия президенти Владимир Путинни Украина бўйича музокаралар столига қайтаришни сўради.

Мишел тўрт йил ичида биринчи марта Хитойга ташриф буюрди, унинг сафари Хитой ва Ғарб мамлакатлари ўртасида кескинлик кучайиб бораётганига қарамасдан, Пекин билан алоқаларни сақлаб туришга қаратилган.

Хитойнинг Украинадаги урушга муносабати

Россия Украинада ҳарбий операция бошлаганидан буён Хитой бетараф позицияни эгаллаб, Украина ҳудудий яхлитлигини ёқлаб келаётганди, аммо санкциялар киритмаган. Россияда қисман сафарбарлик эълон қилингач, Пекин ҳарбий ҳаракатларга нуқта қўйиш ва томонларнинг хавфсизлик соҳасидаги хавотирларини бартараф қилиш учун уларни музокараларга чақирди.

Кейинроқ Хитой Ташқи ишлар вазирлиги томонлар дастлабки шартларсиз музокараларни қайта бошлаши кераклигини айтди.

Таъкидлаш жоиз, Путин ва Сзинпин Украинада Россия махсус операцияси бошланишидан сал аввал, 4 февраль куни Пекинда учрашган. Ўшанда эълон қилинган қўшма баёнотда Хитой Россиянинг НАТО шарққа кенгаймаслиги ҳақидаги талабини ва Европада хавфсизлик кафолатлари бўйича бошқа таклифларни қўллаб-қувватлаганди. Россия президенти Владимир Путин ўшанда Хитой раиси Си Цзиньпинни Украинада ҳарбий операция бошлаши ҳақида огоҳлантирмаган.