Сурхондарё вилоятининг Қумқўрғон туманида жойлашган Жанубий Сурхон сув омбори ҳудудида қиймати 140 млрд сўмлик экотуризм комплекси қурилади.

Вилоят ҳокимлиги матбуот хизматининг хабар қилишича, 24 август куни ҳоким Улуғбек Қосимов таклиф ва тавсиялар асосида такомиллаштирилган лойиҳа тақдимоти билан танишди. Ҳудуд кўздан кечирилиб, қурилиш ишларини тизимли ва босқичма-босқич амалга ошириш, белгиланган талаблар асосида қисқа муддатда бошлаш вазифаси топширилди.
-_TQ-BrmQ.avif)
Экотуризм комплекси 15,7 гектар майдонда ташкил этилади. Лойиҳа доирасида табиий муҳитни асраб-авайлаш, янги яшил майдонлар ташкил этиш, экологик талабларга мос йўл ва инфратузилмалар барпо этиш ҳамда оқова сувларни тозалаш тизимини жорий қилиш назарда тутилган.
ЎзАнинг ёзишича, йирик сув омбори ҳудудида қад ростлайдиган замонавий экотуризм масканида коттеж уйлар, бассейн, автотураргоҳ ва автомобилларни ювиш шохобчалари, савдо, умумий овқатланиш ва бошқа маиший хизмат кўрсатиш нуқталари, сувусти айвонлари қад ростлайди. Спорт ва болалар майдончалари, пиёдалар йўлаклари қурилади. Балиқчилик йўлга қўйилади. Атрофи яшил бойликлар билан кўкаламзорлаштирилади. Маҳаллий ва хорижлик сайёҳлар учун барча қулайлик яратилади.

Жанубий Сурхон сув омбори — бундан 58 йил аввал ишга туширилган бўлиб, денгиз сатхидан 408 метр баландликда жойлашган. Сув сатҳи юзаси 65 квадрат-километрни, тўла сув сиғими 800 миллион куб-метрни ташкил этади.
Президентнинг 2024 йил декабрда имзоланган “Сурхондарё вилоятининг тоғли-рекреацион ҳудудларида туризм инфратузилмасини яхшилаш ҳамда замонавий хизмат кўрсатиш ва туризм объектларини барпо этиш чора-тадбирлари тўғрисида”ги қарорига мувофиқ, Сурхондарё вилоятида 3 та йирик туризм маркази барпо этилмоқда. Улардан яна бири — 615 гектар майдонни қамраб олган “Сангардак туризм марказидир. Қиймати 913,3 миллиард сўм бўлган ушбу лойиҳа 615 гектар майдонни қамраб олади. Учинчиси Бойсун туманида умумий майдони 220,5 гектарни ташкил этувчи ер участкасини қамраб олган “Омонхона” туристик марказидир.
Изоҳ (0)