Евроиттифоқ томонидан Россияга қарши жорий этилган санкциялар урушни қўллаб-қувватлаётган Беларусдан ташқари учинчи дунё мамлакатларига йўналтирилмаган. Бу ҳақда Евроиттифоқ расмий вакили Люк Девин Тошкент шаҳрига ташрифи чоғида айтиб ўтди, дея хабар бермоқда «Дарё» мухбири.
Европанинг ташқи ҳаракатлар хизматини Шарқий ҳамкорлик, Россия, Кавказ ва Марказий Осиё бўйича бошқарувчи директори ўринбосари Люк Девин бошчилигидаги делегация 14—15 июль кунлари Тошкентда бўлиб, бир қатор учрашувлар ўтказди. Мулоқот мавзуси 17-18 ноябрь кунлари Самарқандда бўлиб ўтадиган «Европа Иттифоқи — Марказий Осиё» анжумани ва вазирлар даражасидаги учрашувга тайёргарлик кўриш масаласида бўлди.
Люк Девиннинг айтишича, Евроиттифоқ Россияга қарши жорий этган санкциялар Беларусдан бошқа учинчи дунё мамлакатларига йўналтирилмаган.
«Россия томондан Украинага нисбатан қилинаётган агрессияга тўлалигича қарши эканлигимизни эслатиб ўтишимизга ижозат берсангиз. Биз буни ноқонуний босқин деб ҳисоблаймиз. Шунинг учун Россияга қарши санкциялар жорий қилдик. Бу санкциялар глобал аҳамиятга эга эмас ва бу урушни қўллаб-қувватлаётган Беларусдан ташқари учинчи дунё мамлакатларига йўналтирилмаган. Биз бунинг бошқа давлатларга зарар етказишини истамаймиз. Бунга аниқлик киритиш учун Марказий Осиё давлатлари элчихоналари вакиллари билан иккита учрашув ўтказдик ва уларга санкциялардан нима кўзланганини тушунтирдик. Хусусий сектордаги фаол шахсларнинг ҳаракатларини назорат қила олмаймиз. Шунингдек, энергия ташувчи ва озиқ-овқатга бўлган нархларнинг ошишига ҳам бизнинг санкцияларимизнинг таъсири йўқ. Бу Россия Украинанинг озиқ-овқат транспорти билан шуғулланадиган портларини ёпиб қўйгани билан боғлиқ. Биз бундан ҳеч қанақасига манфаатдор эмасмиз» – деди Евроиттифоқ расмийси.
Аввалроқ Люк Девин Ўзбекистоннинг Жаҳон савдо ташкилотига қўшилиш жараёни тез орада якунланишига умид билдирганди.
Изоҳ (0)