“Манчестер Сити” клуби ярим ҳимоячиси Илкай Гундўған фаолиятини Германия Бундеслигасида давом эттириши мумкин. Инсайдер Николо Скиранинг хабарига кўра, Леверкузеннинг “Байер” клуби 34 ёшли футболчи билан боғлиқ маълумотларни “шаҳарликлар” раҳбариятидан сўраган.
Манбаларга кўра, Гундўған “Манчестер Сити” бош мураббийи Хосеп Гвардиоланинг янги мавсум режаларига киритилмаган. Шу сабабли, футболчининг жамоани тарк этиши кутилмоқда.
Шунингдек, Calciomercato нашрининг маълумот беришича, Гундўған билан Италия чемпионатининг бир қатор клублари ҳам қизиқмоқда. Жумладан, “Ювентус” ва “Интер” клублари футболчининг агенти билан боғланган. Маълумотларга кўра, Гундўғаннинг А Серияда ўйнаш истаги мавжуд ва бу қарорга унинг рафиқаси Сара Монтебеллунанинг Италияда туғилгани ҳам маълум даражада таъсир қилган.
“Манчестер Сити” раҳбарияти эса Гундўғаннинг жамоадан кетишига қарши эмас. Сабаби футболчининг йиллик маоши 8 миллион еврони ташкил қилади. Шу боис улар Илкайнинг трансферига “яшил чироқ ёққан”. Клуб ушбу жараённи ёзги трансфер ойнаси ёпилгунига қадар якунлашни режалаштирмоқда.
Илкай Гундўған “Манчестер Сити”га 2016 йил ёзида Дортмунднинг “Боруссия” клубидан ўтган ва 2023 йилгача инглиз клуби сафида тўп сурган. 2023 йил ёзида эса у “Барселона” сафига қўшилиб, бир мавсум Испанияда ўйнади. 2024 йил ёзида эса Англияга қайтиб, “Сити” билан икки йиллик шартнома имзолаган.
Transfermarkt портали маълумотига кўра, Гундўғаннинг трансфер қиймати 5 миллион еврони ташкил қилади.
Изоҳ (0)