2025 йилнинг 12–18 март кунлари Европа иттифоқининг халқаро ҳамкорлик бўйича комиссари Йозеф Сикела Марказий Осиёга ташриф буюради. Бу ҳақда Ўзбекистондаги Европа иттифоқи делегацияси “Дарё”га маълум қилди.
Манбага кўра, ташрифдан Европа иттифоқи ва Марказий Осиё ҳамкорлигини ривожлантириш, янги иш ўринлари яратиш ва барқарор иқтисодий ўсишни кучайтиришга йўналтирилган Global Gateway (“Глобал дарвоза”) инвестицион стратегиясини кенгайтириш мақсад қилинган.
“Глобал дарвоза” стратегиясининг асосий йўналишларидан бири транспортдир. Комиссар минтақа вакиллари билан учрашувларда Транскаспий транспорт йўлагини ривожлантириш орқали юк ва йўловчилар ташиш вақтини қисқартириш ҳамда савдо даражасини оширишни муҳокама қилмоқчи.
Шу билан бирга, мулоқотларда стратегия доирасида илғор тажрибаларни татбиқ этиш, янги иш ўринлари яратиш ва иқтисодий барқарорликни ошириш, рақамли тафовутни камайтириш ва юқори тезликдаги интернетга хавфсиз киришни кенгайтириш масалаларига эътибор қаратилади.
Ўз навбатида сув, энергетика ва иқлим масалалари, жумладан мустаҳкам инфратузилма барпо этиш, арзон ва экологик тоза энергия манбалари таъминотини кенгайтириш бўйича музокаралар кўзда тутилган. Ташриф доирасида мазкур йўналишларга доир шартномалар имзоланиши кутилмоқда.
“Марказий Осиё Европа иттифоқининг муҳим ҳамкори бўлиб, бизнинг ҳамкорлигимиз келажакда катта салоҳиятга эга. Бугунги глобал муаммолар мустаҳкам ҳамкорлик зарурлигини яна бир бор тасдиқлайди ва мен ушбу сафар давомида айнан шуни кучайтиришга интиламан. Менинг мақсадим Европа иттифоқи ва Марказий Осиё ҳамкорлари билан биргаликда амалга оширилаётган Global Gateway лойиҳаларига эътибор қаратишдир. Ушбу лойиҳалар янги иш ўринлари яратиш, бизнес имкониятларини кенгайтириш ва таълимдан тортиб замонавий инфратузилмага қадар муҳим хизматларни яхшилашга ёрдам беради”, дея мақсадини баён қилган комиссар.
Хабар қилинишича, Йозеф Сикела ташрифини Туркманистондан бошлаб, ҳукумат раҳбарлари ва хусусий сектор вакиллари билан учрашади. Транскаспий транспорт йўлагининг стратегик нуқталаридан бири бўлган Туркманбоши портида бўлади.
Қозоғистонда юқори мартабали ҳукумат вакиллари билан учрашувлар, транспорт ва муҳим хом ашё соҳаларидаги икки томонлама ва минтақавий келишувларни имзолаш маросими ўтказилади. Шунингдек, Европа иттифоқи ва қозоғистонлик бизнес вакиллари билан мулоқот режалаштирилган.
Комиссар Тожикистонда ҳам ҳукумат вакиллари билан учрашади. Яшил энергияга ўтиш жараёни ва маҳаллий пахта саноатини қўллаб-қувватлаш лойиҳалари бўйича келишувларни имзолаш маросимида иштирок этади. Ўз навбатида Роғун ГЭСга ташриф буюриб, келажакда лойиҳани қўллаб-қувватлаш имкониятларини кўриб чиқади.
Қирғизистонда ҳам ҳукумат вакиллари билан учрашув ўтказади ва сув, энергетика, транспорт ҳамда инсон капиталини ривожлантиришга оид лойиҳалар бўйича шартномалар имзолайди. Комиссар Жаҳон банки, Осиё тараққиёт банки ва Европа тикланиш ва тараққиёт банки билан инвестиция имкониятларини муҳокама қилади. Кун тартибида Камбарота-1 ГЭСини қуриш бўйича потенциал қўллаб-қувватлаш масаласи ҳам бор.
Йозеф Сикеланинг ташрифи Ўзбекистонда якунланади. Тошкентда комиссар юқори мартабали ҳукумат вакиллари билан учрашиб, Олмалиқ кон-металлургия комбинатига ташриф буюради. Ўзбекистонлик ва европалик тадбиркорлар билан мулоқот қилади. Рақамли алоқалар соҳасида минтақавий лойиҳалар бўйича келишувларни имзолаш маросимида қатнашади.
Комиссар ташрифи апрель ойи бошида ўтказиладиган дастлабки Европа иттифоқи — Марказий Осиё саммити ва июнь ойига режалаштирилган Global Gateway форуми олдидан амалга оширилмоқда.
Изоҳ (0)