Исроил армияси 25 август куни Ғазодаги Носир шифохонасига авиазарбалар берди. Ҳужум оқибатида камида 15 киши ҳалок бўлди. Бу ҳақда Reuters хабар берди.
Гувоҳларнинг сўзларига кўра, шифохонага жами иккита авиазарба йўлланган. Иккинчиси қутқарувчилар, журналистлар ва бошқа одамлар дастлабки ҳужум жойига етиб келганидан сўнг амалга оширилган. Мазкур ҳужум видеоси жонли эфирга узатилган.
Қурбонлар орасида қуйидаги оммавий ахборот воситаларида фаолият юритувчи тўрт нафар журналист бор:
- Ҳоссам ал-Масри — Reuters фотомухбири;
- Моҳаммед Салама — Al Jazeera фотожурналисти;
- Мариам Абу Дақа — The Independent Arabic ва Associated Press каби бир қанча оммавий ахборот воситалари билан ишлайдиган журналист;
- Моаз Абу Таҳа — NBC журналисти.
Исроил қўшинлари Носир шифохонасига биринчи марта ҳужум қилмаяпти ва журналистлар ҳам биринчи марта нишонга олинмаяпти. Шундай ҳужумлардан бири 10 август куни амалга ошган эди. Ўшанда ҳам Al-Jazeera телеканалининг 4 нафар журналисти ҳалок бўлган.
Ғазода 2023 йил 7 октябрда уруш бошланганидан буён 240 дан ортиқ фаластинлик журналист Исроил ҳужумларида ҳалок бўлди.
Изоҳ (0)