“Украина туннелининг охирида ёруғлик кўрмаяпмиз” — Жозеп Боррел

Европа санкциялари Россия мудофаа саноатини йўқ қила олмади ва энди Европа Иттифоқи “Украина туннелининг охирида ёруғликни кўрмаяпти”. Бу ҳақда Европа дипломатияси раҳбари Жозеп Боррел “Европа Иттифоқи – Марказий Осиё” транспорт инвестицион форумида маълум қилди, дея хабар берди “Коммерсант”

Дипломатнинг аниқлик киритишича, Евроиттифоқ Россияга қарши кенг қамровли санкциялар жорий қилган ва бу “Россия ҳарбий машинасини сезиларли даражада заифлаштирган, аммо у ҳали ҳам мавжуд”. 

“Уруш давом этмоқда, жанглар эса кучайиб бормоқда ва биз Украина туннелининг охирида ёруғликни кўрмаяпмиз”, — дейди Боррел.

Ўтган ҳафта у Европа Иттифоқининг 27 давлати ташқи ишлар вазирлари Украинага ёрдамни ошириш ва тезлаштириш зарурлиги ҳақида келишиб олганини айтди. Bloomberg манбаларига кўра, вазирлар Россиянинг музлатилган активларидан олинадиган фойдага солиқ жорий этишга “сиёсий розилик” ҳам берган.

“Украинанинг иттифоқчилари Россия етказган зарари учун тўлаши кераклигига рози”, — дейилади хабарда.