Европанинг ташқи ҳаракатлар хизматини Шарқий ҳамкорлик, Россия, Кавказ ва Марказий Осиё бўйича бошқарувчи директори ўринбосари Люк Девин бошчилигидаги делегация 14-15 июль кунлари жорий йилнинг 17-18 ноябрь кунларида Самарқандда бўлиб ўтадиган «Европа Иттифоқи - Марказий Осиё» барқарор ўзаро алоқадорлик бўйича конференцияси ва вазирлар даражасидаги учрашувига тайёргарлик кўриш учун Тошкентда бир қатор учрашувлар ўтказди.
Жаноб Люк Девин 15 июль куни Тошкент шаҳрида ташриф якунларига бағишлаб ўтказилган матбуот анжуманида Ўзбекистонни Жаҳон савдо ташкилотига қириши бўйича олиб борилаётган ташкилий ишлар юзасидан фикр билдириб ўтди, бу ҳақда «Дарё» мухбири хабар бермоқда.
«Баъзи давлатлар тезроқ ва кўпроқ юрган бўлиши мумкин. Буларнинг барчаси нисбий. Жаҳон савдо ташкилоти ўз йўналишида ягона ташкилот ҳисобланади. Ўзбекистон узоқ йиллар мана шу инвестиция доирасидан ташқарида бўлганини ҳисобга олиш керак. Икки томонлама ҳамкорлик, жумладан, ҳамкорликни кенгайтириш келишуви доирасида Ўзбекистоннинг ташкилотга кириши борасида бир қанча масалалар бор. Биз техник музокаралар ўтказиш жараёнидаги қатор тадбирларни ўтказишни молиялаштирдик. Ва шу тариқа техник масалаларда кўмаклашдик. Умид қиламизки, жараён тез орада якунланади ва Ўзбекистон Жаҳон савдо ташкилотига қўшилади. Агар эътибор қаратилса, ташкилот аъзоси бўлмаган давлатлар иқтисодий жиҳатдан ривожланмаган мамлакатлар ҳисобланади. Табиий нефть ва гази борасида муаммоси йўқ давлатларни ҳисобга олмаганда, албатта», – деди жаноб Люк Девин
Ноябрь ойида ЕИ ва Марказий Осиёнинг вазирлар даражасидаги учрашув ҳамда Марказий Осиё билан ўзаро алоқадорлик бўйича ЕИнинг биринчи минтақавий конференцияси ўтказилади
Марказий Осиё билан барқарор ўзаро алоқадорлик бўйича Самарқанд конференцияси 2021 йил декабрь ойида қабул қилинган ЕИнинг «Глобал дарвоза» номли янги стратегияси доирасидаги ўзаро алоқадорлик бўйича биринчи минтақавий конференция бўлади. Бу эса ЕИнинг Марказий Осиё бўйича стратегиясида келтирилган барқарорлик, равнақ топиш ва минтақавий ҳамкорлик мақсадларини ҳаётга татбиқ этишга кўмаклашувчи умумий концепциялар бўйича ички-ташқи минтақалараро мулоқот учун платформани таъминлайди. Бу Марказий Осиё мамлакатларига модернизациялаш, инвестицияларни рағбатлантириш, рақамлаштиришда ёрдам кўрсатиш, минтақалараро ички савдо ва транспорт ҳамда савдо йўлларини диверсификациялашда кўмак бериш борасида ЕИ саъй-ҳаракатларининг бир қисми бўлади.
Ҳар йили ўтказиладиган «ЕИ - Марказий Осиё» вазирлар даражасидаги учрашувда бешта Марказий Осиё давлатларининг ташқи ишлар вазирлари, ҳамда Европа Иттифоқининг ташқи ишлар ва хавфсизлик сиёсати бўйича Олий вакили - Европа комиссияси раисининг ўринбосари Жозеп Боррел ва халқаро ҳамкорлик бўйича ЕИ комиссари Ютта Урпилайнен иштирок этади, бу эса, ўз навбатида, ЕИ ва Марказий Осиё ўртасидаги ҳамкорлигини муҳокама қилиш имконини беради.
Эслатиб ўтамиз, 2021 йилнинг ноябрь ойида Президент Шавкат Мирзиёев Ўзбекистонда амалий ташриф билан келган Жаҳон божхона ташкилоти бош котиби Кунио Микурияни билан суҳбатда Ўзбекистоннинг тез фурсатда Жаҳон савдо ташкилотига кириши билан боғлиқ масалаларда яқиндан ҳамкорлик қилиш зарур экани таъкидланган эди.
Республиканинг ЖСТга аъзо бўлиш жараёни 2019 йил июль ойида Ўзбекистон мазкур ташкилотга аъзо бўлиш учун ташқи савдо режими тўғрисидаги янгиланган меморандумни кўриб чиқишга тақдим этган пайтда бошланган эди. Ўзбекистоннинг ЖСТга аъзо бўлиши жараёнининг давом эттирилиши Шавкат Мирзиёев томонидан 2017—2021 йилларда Ўзбекистоннинг Ҳаракатлар стратегиясида давлатнинг савдо-иқтисодий соҳасида ривожланишнинг устувор йўналишларидан бири сифатида белгиланганди.
Шавкат Мирзиёев 2020 йилнинг 29 декабрида Олий Мажлисга йўллаган Мурожаатномаси давомида 2021 йилда ЖСТга аъзолик масаласи бўйича ишларни фаоллаштириш лозимлигини таъкидлаганди. Ўша йили Ўзбекистоннинг ЖСТга аъзо бўлиши учун идоралараро комиссия тузилди.
2021 йил 26 октябрь куни Сардор Умурзоқов ЖСТ раҳбарияти билан Ўзбекистоннинг ташкилотга аъзо бўлиш масаласини муҳокама қилди. Ташкилот раҳбарияти республикани ЖСТга аъзо бўлиш жараёнида ҳар томонлама қўллаб-қувватлашга тайёр эканлигини билдирган.
Изоҳ (0)