Украина бўйича Европасиз тузилган ҳар қандай тинчлик келишуви “муваффақиятсизликка учрайди”. Бу ҳақда Евроиттифоқ дипломатияси раҳбари Кая Каллас маълум қилди.
Каллас 13 февраль куни Брюсселда НАТО давлатлари мудофаа вазирлари учрашувида иштирок этди.
Бизсиз тузилган ҳар қандай келишув муваффақиятсизликка учрайди, чунки Европа ва Украина ҳам уни бажариши шарт. Ҳар қандай шошилинч қарор — ифлос битим... Бу қотилликларни тўхтата олмайди, урушни тўхтата олмайди, деди Каллас.
“Кенг қамровли можародан қочиш керак”
Сиёсатчи, шунингдек, Украина атрофидаги ҳозирги вазият билан 1938 йилдаги Чехословакияга қуролий ёрдам зарур бўлган “Мюнхен битими” ўртасидаги ўхшашликларни таъкидлади.
Ҳозир биз ҳам кенг кўламли можаронинг олдини олиш учун Украинага тажовуздан ҳимояланишда ёрдам беришимиз керак, деди Каллас.
Брюсселдаги музокараларда Украина мудофаа вазири Рустем Умеров, шунингдек, АҚШ ва Германия мудофаа идоралари раҳбарлари Пит Хегсет ва Борис Писториус иштирок этди. Каллас Украина мудофаа вазири билан учрашди.
Агар Украина қаршилик кўрсатишга қарор қилса, Европа Украинани қўллаб-қувватлайди, дея таъкидлади у.
Каллас Европа иттифоқи ҳам амал қиладиган суверенитет ва ҳудудий яхлитлик тамойиллари ҳақида гап кетаётганини қўшимча қилди.
“Мюнхен битими”
1938 йил 30 сентябрда Мюнхенда Буюк Британия бош вазири Невилл Чемберлен, Франция бош вазири Эдуард Даладе, Италия раҳбари Бенито Муссолини ва Германияси раҳбари Адолф Гитлер томонидан имзоланган шартномада Судет вилоятининг Германияга қўшилиши белгилаб қўйилди.
30 сентябргача мазкур вилоят таркибига кирган Чехословакия имзолаш маросимига таклиф этилмади. Бу келишув тарихга “Мюнхен битими” номи билан кирди.
Ғарб тарихчиларининг кўпчилиги инглиз ва француз сиёсатчилари бутун Европани қамраб олиши мумкин бўлган урушдан қўрқиб, Гитлер Чехословакия ҳудудининг бир қисмини қўлга киритгач тинчланишига умид қилиб, “тинчлаштириш сиёсати”ни олиб боришга урган, деган фикрни қўллаб-қувватлайди.
Изоҳ (0)