«Дарё» нашри 21 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россиянинг Украинага уруш бошидан буён учирган ракеталари бугун қандай талафотларни олиб келди?
270 кундан буён давом этаётган кенг кўламли урушда Россия армияси Украинага 4700 дан ортиқ ракета учирди. Бу ҳақда 20 ноябрь куни Украина президенти Владимир Зеленский Франкофония халқаро ташкилоти иштирокчиларига йўллаган видеомурожаатида маълум қилган.
«Юзлаб шаҳарларимиз шунчаки ёқиб юборилди. Минглаб одамлар ҳалок бўлди. Юз минглаб одамлар Россияга мажбуран депортация қилинди. Миллионлаб одамлар урушдан қочиш учун Украинани ташлаб бошқа мамлакатларга кетди. Биз бунга чек қўйишимиз , Россия агрессиясини тўхтатишимиз керак», — деди Украина президенти.
Зеленский Украинага берилган охирги оммавий зарбалардан бирини эслатиб ўтди — 15 ноябрь куни мамлакат бўйлаб юзга яқин ракета учиб келганди.
Шаҳарларимизга, турар жой биноларига қарши, корхоналарга, электр станцияларига қарши юзта турли хилдаги ракеталар. Ракета ҳужуми нима эканини биласизми? Бу электр энергиясидан маҳрум қолган 20 миллиондан ортиқ одам. Энергия тизимига етказилган зарар, уларни фавқулодда ўчириш. Энергетика секторига ракета ҳужуми туфайли иккита атом станциямиздаги реакторлар ҳам ёпилди», — дея таъкидлаган Зеленский.
Россия Мудофаа вазирлиги 10 октябрдан буён Украинанинг ҳарбий ва энергетика объектларига мунтазам ракета зарбалари бериб келмоқда ва буни 8 октябрь куни Керч бўғозидаги Қрим кўприги портлатилишига жавоб деб атамоқда.
Боррел Евроиттифоқ ва Марказий Осиё ўртасида Россияни айланиб ўтувчи транспорт йўлакларини қуришни таклиф қилди
Евроиттифоқ Ўрта Осиё билан ҳамкорликни кучайтириши керак, деб ҳисоблайди Европа дипломатияси раҳбари Жозеп Боррел. Унинг фикрича, минтақанинг энергетика етказмалари, ўта муҳим хом ашё импорти ва Россияни айланиб ўтувчи янги транспорт йўлаклари бўйича салоҳиятини амалга ошириш керак.
«Евроиттифоқ сифатида биз бу ўзгаришлардан фойдаланиб қолишдан манфаатдормиз. Биз минтақа билан алоқаларимизни чуқурлаштиришимиз, унинг улкан салоҳиятини ишга туширишимиз керак, булар эса энергия манбалари, ўта муҳим хом ашё етказиб бериш ва Россияга боғлиқ бўлмаган янги транспорт йўлакларидан иборатдир», — деб ёзди Боррел ўз блогида Марказий Осиёга сафари якунлари ҳақида.
Унинг қайд этишича, гап Транскаспий йўлаги ҳақида бормоқда, унинг Қозоғистонга ташрифи чоғида уни ривожлантириш масаласи муҳокама қилинган эди.
Жозеп Боррел Марказий Осиёга ташрифи мобайнида Евроиттифоқ ушбу минтақа мамлакатларига инвестициялар ҳажми бўйича етакчилик қилаётгани, ушбу кўрсаткич бўйича Россия ва Хитойни ортда қолдираётганини маълум қилди.
Туркиядаги шаҳарга Суриядан ракеталар келиб тушди. Бу "Тирноқ қилич операцияси билан боғлиқми?
Туркиянинг Каркамиш шаҳри(Газиантеп вилояти)га Сурия шимолидан бешта ракета келиб тушди, деб хабар бермоқда CNN Turk минтақа губернатори Довут Гулга таяниб.
Губернаторнинг айтишича икки киши ҳалок бўлган, олти киши жароҳатланган. Туркия ички ишлар вазири Сулаймон Сойлу уч нафар, жумладан бир бола ва бир ўқитувчи ҳалок бўлганини маълум қилди.Haberturk маълумотларига кўра, ракеталар Туркияда террорчи деб тан олинган курд «Халқ ҳимояси отрядлари» ва «Курдистон ишчилар партияси» томонидан учирилган.
Туркия президенти Ражаб Тоййиб Эрдўғон Индонезиядаги G20 саммитидан қайтгач, Сурия шимоли ва Ироқдаги курд тузилмаларига қарши «Тирноқ-қилич» операциясини ўтказишга буйруқ берганди.20 ноябрь куни эрталаб Анқара Ироқ ва Сурия шимолидаги курдлар томонидан назорат қилинадиган ҳудудларга зарба бергани, чунки бу ҳудудлардан «террорчилар Туркияга қарши ҳужумларда база сифатида фойдаланган»и ҳақида эълон қилди. Операцияга 50 дан ортиқ самолёт ва 20 та дрон жалб қилинган.
Туркия курдларни Истанбулдаги терактни уюштирганликда айбламоқда.
Бола ҳуқуқлари бўйича вакил Фарғонада 15 ёшли боланинг ўлимида айбланаётган вояга етмаганлар билан учрашди
Бола ҳуқуқлари бўйича вакил Алия Юнусова 18 ноябрь куни Фарғона вилоят прокуратурасида 15 ёшли ўсмир ўлимида айбланаётган ва қамоққа олинган вояга етмаган болалар билан учрашди.
Фарғона вилояти Қўқон шаҳридаги Вояга етмаганларга ҳуқуқий ёрдам кўрсатиш марказида сақланган 9-синф ўқувчиси вафот этган. Ҳуқуқни муҳофаза қилувчи органлар томонидан марҳумнинг 17 октябрь куни марказда вақтинча сақланаётган 6 нафар болаларга қўшилганидан сўнг, ушбу болалар ётоқхонасида хонадаги болалар билан ўзаро гап талашиб, жанжал келиб чиқиш оқибатида марҳум дўппосланиб, унга оғир тан жароҳати етказилгани айтилган.
Ўзаро суҳбат давомида қўлга олинган болалар, уларга қўйилган айбни тан олган ва ўзларига нисбатан қийноқ, руҳий ва жисмоний босим қўлланилмаганини, адвокатлар билан таъминлашганини билдирган.
Болалар омбудсмани ҳуқуқни муҳофаза қилувчи органлар вакиллари билан мулоқотда бола ҳуқуқлари ва манфаатларини ҳимоя қилиш бўйича ўз тавсияларини бериб ўтган. Ҳозирда мазкур ҳолат бўйича Фарғона вилоят прокуратураси томонидан тергов ҳаракатлари олиб борилмоқда.
Изоҳ (0)