АҚШнинг мақсади Марказий Осиё мамлакатлари ва Россия иқтисодиётларини бир-биридан ажратиш бўлиши керак, деди АҚШ Халқаро тараққиёт агентлиги (USAID) директори ёрдамчисининг ўринбосари Анжали Каур Вакиллар палатасининг ташқи ишлар қўмитаси эшитувларида.
Бу амалга ошиши учун идора минтақада «инсон салоҳияти ривожланишига, иқтисодий ўсишга, иқлим ўзгаришларига қарши курашга» ёрдам беришга ҳаракат қилади. Вашингтон Украинадаги зиддият фонида Марказий Осиёдаги шериклар билан алоқаларни мустаҳкамлаш имкониятини қидирмоқда, деди Каур.
АҚШ, Буюк Британия, Япония, Австралия, Канада, Япония, Евроиттифоқ мамлакатлари ва бошқа давлатлар Россия 24 февралда Украинада бошлаган ҳарбий операцияга қатъий санкциялар билан жавоб қилди. Ушбу мамлакатлар раҳбарияти Россияни яккалаб қўйиш, уни глобал иқтисодиётда иштирок этиш имтиёзларидан маҳрум қилиш ниятини маълум қилди. Россия ҳукумати буни амалга ошириб бўлмаслигини, Москва эса шундай шерикликдан манфаатдор бўлган давлатлар билан ҳамкорлик қилишда давом этишини айтди.
Дўст бўлмаган давлатлар билан иқтисодий ҳамкорлик учун имкониятлар чекланганидан кейин, Москва эътиборини Осиёга йўналтиришга қарор қилди. Ташқи ишлар вазири Сергей Лавров май ойида Марказий Осиё мамлакатлари билан Россияни стратегик шериклик алоқалари, «аксарияти билан эса — иттифоқдошлик алоқалари» боғлаб туришини айтганди. Лавровнинг сўзларига кўра, Қозоғистон, Қирғизистон, Тожикистон, Туркманистон ва Ўзбекистон билан 900 дан зиёд икки томонлама шартномалар ва ҳукуматлараро битимлар тузилган, савдо-иқтисодий алоқалар ривожланмоқда.
Moody’s экспертлари март ойидаги маърузасида Россияга қарши санкциялар МДҲ мамлакатлари иқтисодиётига салбий таъсир кўрсатиши ҳақида огоҳлантирганди. Хусусан, у ерда Россиядан пул ўтказмалари ҳажми қисқаради, Марказий Осиё учун эса бу даромадларнинг муҳим қисмидир. Бундан ташқари, таҳлилчилар ушбу давлатларда ишсизлик даражаси ўсишини прогноз қилмоқда.
Изоҳ (0)