Европа иттифоқи давлатлари январь ойи охирида Сурияга қарши санкцияларни бекор қилишни муҳокама қилади. Бу ҳақда Евроиттифоқ дипломатияси раҳбари Кая Каллас хабар берди.
“Биз шу вақтга келиб (санкцияларни бекор қилиш тўғрисида) қарор қабул қилиш имконияти ҳақиқатан ҳам пайдо бўлиши учун ишлаяпмиз”, деди Каллас.
Европа иттифоқи кенгашининг мажлиси 27 январга режалаштирилган. Шу билан бирга, Каллас ўзининг Х (собиқ Twitter) саҳифасида гап санкцияларни бекор қилиш ҳақида эмас, балки уларни юмшатиш тўғрисида боришига аниқлик киритди.
Reuters нашрига кўра, Германия, Италия ва Франция санкцияларни бекор қилишни талаб қилмоқда. Аммо якуний қарор фақат бутун блок томонидан қабул қилиниши мумкин. Вашингтон гуманитар ёрдам оқимини енгиллаштириш учун Башар Асад ҳукмронлиги тугаганидан сўнг 6 ойга Суриядаги ҳукумат идоралари билан операцияларни санкциялар рўйхатидан чиқарган.
6 январь куни АҚШ Сурия ҳукумат идоралари билан баъзи молиявий операциялар, энергия ресурслари билан боғлиқ транзакциялар, Сурия Марказий банки орқали ўтказмалар вақтинча санкциялардан чиқарилганини эълон қилди.
Бу қарор билан АҚШ санкциялари остидаги шахсларнинг мол-мулки ёки мулкий манфаатларини блокдан чиқарилмайди. Санкциялар остидаги мамлакатлар билан молиявий ўтказмаларни амалга ошириш имкони бўлмайди.
Ҳозирда Суриянинг деярли бутун аҳолиси қашшоқлик чегарасидан пастда яшайди. Тахминан 75 фоизи кунига киши бошига 3,65 доллардан кам, 33 фоизи эса 2,15 доллардан кам маблағ билан кун кечирмоқда. 2011 йилда бошланган фуқаролар урушигача Сурия йирик нефть экспортчиси бўлиб, бундан йилига 3-5 миллиард доллар даромад олган, асосий харидорлари Европа мамлакатлари эди.
Суриянинг янги ҳукумати кўплаб нефть конлари устидан назоратни йўқотган. Бу конлар асосан республиканинг шимоли-шарқида жойлашган бўлиб, уларни ҳали ҳам Дамашқнинг янги ҳокимиятига бўйсунмайдиган курд кучлари назоратида.
Асад режимининг қулаши 2024 йилнинг 8 декабрида содир бўлди. Ҳокимият “Ҳаёт Таҳрир аш-Шом” қўлига ўтди. Асад Москвада яқин доиралари, жумладан, оиласи билан бирга сиёсий бошпана топди.
Изоҳ (0)