Европа иттифоқи (ЕИ) мамлакатларидан бирида Йўл ҳаракати қоидаларини қўпол равишда бузган ҳайдовчилар бутун иттифоқ ҳудудида ҳайдовчилик ҳуқуқидан маҳрум бўлишлари мумкин.
25 март куни Европарламент ва Европа иттифоқи мамлакатлари вакиллари йўл ҳаракати қоидаларини жиддий бузганлик учун жавобгарлик ҳайдовчилик гувоҳномаси берилган мамлакатдан қатъий назар, бутун Европа иттифоқига тааллуқли бўлиши тўғрисида келишувга эришди.
Амалдаги қоидаларга кўра, ҳайдовчи йўл ҳаракати қоидаларини бузганлиги учун гувоҳномасидан маҳрум қилиш жазоси фақат қоидабузарлик содир этилган мамлакатда қўлланилади. Европа иттифоқининг қолган мамлакатларида, шу жумладан гувоҳнома берилган мамлакатда ҳайдовчилик тақиқи амал қилмайди.
Янги келишувга кўра, қоидабузарлик ва жазо тўғрисидаги маълумотлар ҳайдовчилик гувоҳномасини берган давлатга юборилади. Айнан у жазонинг ижросини ва унинг бутун Европа иттифоқи ҳудудида амал қилишини таъминлаши керак.
Янги қоидалар Европа иттифоқи мамлакатларини қуйидаги қўпол қоидабузарликлар учун ҳайдовчилик гувоҳномасидан маҳрум қилиш тўғрисида дарҳол хабар беришга мажбур қилади:
Маст ҳолда ёки гиёҳванд модда таъсирида ҳайдаш;
Тезликни 50 км/соатдан ошириш;
Ўлим билан тугаган ЙТҲ.
Ҳайдовчилар 20 иш куни ичида санкциялар ҳақида хабардор қилинади ва улар устидан шикоят қилишлари мумкин.
Янги қоидалар кучга кирганидан беш йил ўтгач, Еврокомиссия жазо бутун Европа иттифоқига татбиқ этиладиган қоидабузарликлар рўйхатини кенгайтириш зарурлигини баҳолайди. Шунингдек, янги тартиб янада самаралироқ ишлаши учун қоидабузарликлар ҳақида хабар беришнинг қатъийроқ муддатларини жорий этиш режалаштирилган.
Изоҳ (0)