Ўзбекистон, Қозоғистон ва яна бешта давлат компаниялари Европа иттифоқи (ЕИ) санкциялари остида қолди. Улар Россия армияси учун икки мақсадли маҳсулотлар етказиб беришда айбланди. Бу ҳақда Европа кенгаши сайтида хабар берилди.
Европа иттифоқи Россияга қарши санкцияларнинг 16-пакетини маъқуллади. Савдо чекловларини бузганлар рўйхатига 53 та фирма қўшилди. Уларнинг учдан бир қисми Россияда рўйхатга олинган. Қолганлари эса Хитой (Гонконгни ўз ичига олган ҳолда), Ҳиндистон, Қозоғистон, Сингапур, Туркия, Бирлашган Араб Амирликлари ва Ўзбекистонда жойлашган.
Европа иттифоқининг таъкидлашича, санкциялар остидаги компаниялар Россияга ракеталар ва зарба берувчи дронлар ишлаб чиқариш учун компонентлар етказиб берган. Европа кенгаши ҳозирча бу фирмаларнинг номини ошкор қилмаган.
Таъкидланишича, Россия яширин флотининг 74 та кемасига хизмат кўрсатишга чекловлар киритилган. Европа иттифоқи биринчи марта Россия Марказий банкининг “Молиявий хабарларни узатиш тизими” (SPFS) дан фойдаланадиган Россиядан ташқарида ташкил этилган кредит ёки молия институтлари билан операцияларни тақиқламоқда. SPFS — бу Россия Марказий банки томонидан чеклов чоралари таъсирини бартараф этиш учун ишлаб чиқилган махсус молиявий хабар алмашиш хизмати.
Европа иттифоқидаги ёки Европа аудиториясига мўлжалланган яна саккизта ташвиқот оммавий ахборот воситалари фаолияти тўхтатилди. Улар “Россиянинг Украинага қарши тажовузини қўллаб-қувватлаши ва оқлаши” таъкидланди.
Уларнинг Европа иттифоқидаги трансляция лицензиялари тўхтатилади. Шу билан бирга, жорий этилаётган чора-тадбирлар ушбу оммавий ахборот воситалари ва уларнинг ходимларига “Европа иттифоқида эфирга узатишдан бошқа фаолиятни амалга оширишга, масалан, тадқиқотлар ўтказиш ва интервью беришга” тўсқинлик қилмайди.
Мана уч йилдирки, Россия Украинага тинимсиз бомба ёғдириб, ўзиники бўлмаган ерларни тортиб олишга уринмоқда. Санкцияларнинг янги босқичи нафақат Россия соя флотини, балки хавфли нефть танкерлари фаолиятини қўллаб-қувватловчиларни, дронларни бошқарадиган видео ўйин назоратчиларини, санкцияларимизни четлаб ўтадиган банкларни ва ёлғон гапирадиган ташвиқот воситаларини нишонга олади.
Босқинчи ким экани, бу уруш учун ким тўлаши ва жавоб бериши кераклиги ҳақида ҳеч қандай шубҳа йўқ. Ҳар бир санкциялар пакети Кремлни уруш олиб бориш учун маблағдан маҳрум қилади. Россиянинг тажовузкорлигини тугатиш бўйича музокаралар олиб борилаётган бир пайтда, биз Украинани энг кучли позицияга қўйишимиз керак. Санкциялар дастакни таъминлайди, дея чекловларга изоҳ берди Евроиттифоқ дипломатияси раҳбари Кая Каллас.
Изоҳ (0)