G7 давлатлари Эрон Россияга баллистик ракеталар ва бошқа ҳарбий технологияларни етказиб берса, санкциялар қўллаш билан таҳдид қилди. Баёнот G7 сайтида эълон қилинган.
Агар Эрон Россияга баллистик ракеталар ёки тегишли технологияларни етказиб беришни бошласа, биз тезкор ва мувофиқлаштирилган тарзда жавоб беришга, жумладан, Эронга қарши янги ва муҳим чоралар кўришга тайёрмиз, — дейилади баёнотда.
Катта еттилик давлатлари Эрон аллақачон Россияга дронлар етказиб берганини эслатиб, бу ҳолат давом этса, “минтақадаги беқарорлик кучайиши”ни таъкидлади.
21 февраль куни Reuters агентлиги Эроннинг олти ҳарбий мулозимига таяниб, Теҳрон Москвага 400 та ер-ер баллистик ракеталарини юборишга тайёрланаётгани ҳақида хабар берди. Бунга жавобан АҚШ Давлат департаменти матбуот хизмати раҳбари Меттью Миллер Эронга “тез ва қаттиқ чоралар” қўллаш билан таҳдид қилди. Евроиттифоқ агар ракета етказиб бергани тасдиқланса, Эронга қарши қўшимча санкциялар жорий этишга тайёрлигини маълум қилди.
Украина 2023 йил июль ойида Россия Эроннинг “Shahed” дронларидан фойдаланишни бошлаганини эълон қилди. Декабрь ойида Европа Иттифоқи Эрондаги бешта дрон ишлаб чиқарувчи компанияга нисбатан санкциялар жорий қилган эди. Шундан сўнг Эрон ташқи ишлар вазири Ҳусайн Амир Абдуллоҳийян унинг мамлакати ҳеч қачон Россияга Украинада фойдаланиш учун дронлар ва ракеталар етказиб бермаганини айтди.
Изоҳ (0)