Суриянинг янги ҳукумати Россия раҳбари Владимир Путиндан собиқ президент Башар Асадни суд жараёни учун экстрадиция қилишни сўради. Бу ҳақда Al Arabiya хабар берди.
Расмий сўров Сурия президенти ва “Ҳайъат Таҳрир аш-Шом” гуруҳи етакчиси Аҳмад аш-Шаръа (Ал-Жулоний) номидан Москвага юборилган. Бунгача Башар Асад Москвага юборган маблағларни қайтариш сўралган эди, дея хабар беради Reuters манбалари.
Россия делегациясининг яқинда Дамашқдаги ташрифида Асадлар оиласининг Россия активларига ҳеч қандай сармояси йўқлиги ҳақида маълумот берилган.
Ушбу учрашув давомида Сурия вакиллари Асадни мамлакатда суд қилиш учун Москвага топшириш масаласини яна кўтарган, деб ёзади Al Arabiya.
Бироқ уч соат давом этган музокаралардан сўнг, Россия томони Асадни экстрадиция қилиш масаласи “икки давлат ўртасидаги муносабатларни тиклаш учун енгиб бўлмас тўсиқ эмаслиги”ни таъкидлаган.
20 март куни Путин суриялик ҳамкасбига ҳамкорликни давом эттириш таклифи ва унинг “вазиятни барқарорлаштириш бўйича саъй-ҳаракатларини” қўллаб-қувватлаш сўзлари билан мактуб йўллади. Гап Сурияда ҳукумат қўшинлари ва Асад тарафдорлари ҳисобланган алавийлар ўртасида юз берган қуролли тўқнашувлар ҳақида кетмоқда. Март ойи бошида Суриянинг шимолий вилоятларида бўлиб ўтган ушбу жангларда мингдан ортиқ тинч аҳоли ҳалок бўлди.
Февраль ойи бошида Суриянинг янги мудофаа вазири Мурхаф Абу Касра Россиянинг Тартус ва Хмеймимдаги ҳарбий базалари масаласида мамлакат биринчи навбатда ўз манфаатларидан келиб чиққан ҳолда ҳаракат қилишини таъкидлаган. У Россия Сурияга зарур бўлган нарсани, масалан, Москвада яширинган Асадни таклиф қилса, объектларни сақлаб қолиш имкониятига эга бўлишини айтган.
Путин сўнгги ойларда Суриядаги ҳарбий базалари ва Россия таъсирини сақлаб қолиш умидида Асад ҳокимият тепасида бўлган янги Сурия ҳукумати томон қадам ташламоқда. Масалан, ўтган ҳафта мамлакатга Россия нефти ортилган бир неча танкер келгани маълум бўлди. Бунгача, февраль ва март ойларида Дамашққа самолётларда Асад даврида Москвада чоп этилган Сурия валютаси олиб келинган. Маълумот ўрнида, Башар Асад оиласи билан Москвадан бошпана сўраган ва у ерда истиқомат қилмоқда.
Изоҳ (0)