Литва Россия ва Беларусь билан чегарада пиёдалар ҳамда танкларга қарши миналар ўрнатмоқчи. Аввалроқ Польша чегарасини тегишли тарзда ҳимоя қилиши маълум бўлганди.
Литва миллий мудофаа вазири Довил Шакалене Болтиқбўйи мамлакатлари ва Польшадаги ҳамкасблари билан “контрмобиллик концепциясини янгилаш ва кенгайтириш”ни муҳокама қилди. Шакален бу борада Польша тажрибасига ишора қилган.
Минтақавий ҳамкорлар ушбу мақсадга эришиш учун Европа Иттифоқидан молиялаштиришга эришмоқчи, деди Литва Мудофаа вазирлиги.
Польша мудофаа вазири ўринбосари Павел Бейда 18 март куни Россия ва Беларусь чегарасида пиёдаларга қарши миналар ўрнатилишини айтди. У гап миллион дона мина ҳақида кетаётгани, уларни маҳаллий ишлаб чиқариш режалаштирилганини таъкидлади.
Польша мудофаа вазири Владислав Косиняк-Камиш бу “Польшанинг шарқий чегараси ва НАТОнинг шарқий қанотини мустаҳкамлаш бўйича 1945 йилдан бери амалга оширилган энг йирик лойиҳа” деб атаган.
Болтиқбўйи давлатлари ва Польша пиёдаларга қарши миналар бўйича конвенциядан чиқмоқчи
18 март куни Латвия, Литва, Эстония ва Польша пиёдаларга қарши миналарни тақиқлаш бўйича Оттава конвенциясидан чиқиш ниятини эълон қилди. Тўрт давлат мудофаа вазирлари бу қарорни Россиянинг Украинага бостириб кириши ортидан НАТОнинг Россия ва Беларусь билан чегарадош давлатлари учун ҳарбий таҳдид сезиларли даражада ошгани билан изоҳлади.
Мамлакатларимиз хавфсизлигимизни ҳимоя қилиш учун ҳар қандай зарур чораларни кўришга тайёр ва қўллай олади, дейилади Болтиқбўйи давлатлари ва Польша ҳарбий идораларининг қўшма баёнотида.
Пиёдаларга қарши миналарни тақиқлаш тўғрисидаги конвенцияни 1997 йилда 160 давлат имзолаган, Россия улар қаторига кирмаган. Агар Латвия, Литва, Эстония ва Польша конвенциядан чиқса, улар яна қуруқликдаги миналарни ишлаб чиқариши, жойлаштириши, сақлаши ва етказиб бериши мумкин бўлади. Конвенциядан чиқиш ушбу мамлакатларнинг миллий парламентлари томонидан маъқулланиши керак.
Декабрь ойида Финляндия ҳам Россиянинг Украинада пиёдаларга қарши миналардан фойдаланиши муносабати билан конвенциядан чиқиш имкониятини кўриб чиқаётганини эълон қилганди.
Изоҳ (0)