Украина президенти Владимир Зеленский рус қўшинлари Украина ҳудудидаги Курск йўналишида ҳарбийларни қуршовга олишга уринаётганини айтди. Сиёсатчи Россия президенти Владимир Путиннинг бу борадаги режалари ҳақида гапирди. Бу ҳақда “Украинская правда” хабар берди.
Менинг фикримча, Россия томони украиналик ҳарбийларни айнан шу йўналишда, яъни Курск йўналишида, аммо Украина ҳудудида қуршаб олмоқчи. Энг муҳими, бизнинг қўшинларимиз ва қўмондонлик бундан хабардор, ва биз уларнинг буни қаерда амалга оширмоқчи эканликларини аниқ тушуниб турибмиз. Улар, табиийки, Украина ҳудудида имкон қадар кўпроқ мавжуд бўлишни истамоқда ва ҳеч қандай янгилик йўқ, дея таъкидлади Зеленский брифингда.
У Курск вилоятида Украина қўшинлари қуршаб олингани ҳақидаги маълумотлар “Путиннинг ёлғони” эканини айтди. Зеленский вилоятда Украина армиясининг операцияси давом этаётганини таъкидлади.
Бугун разведка маълумотларимиз бир-бирига мос келгани учун миннатдорман. Биз Украина томони Курск вилояти ҳудудида мавжудлиги ва украиналик ҳарбийларнинг қуршовда қолгани ҳақидаги гаплар Путиннинг ёлғони эканлигини муҳокама қилдик. Курск вилояти ҳудудида Украина ҳарбийларининг ҳеч қандай қуршови йўқ, деди Зеленский.
Сиёсатчи Украинанинг ҳамкорлари унинг сўзларини разведка ва сунъий йўлдош маълумотлари орқали текшириб кўриши мумкинлигини қўшимча қилди.
Россия армияси Украинанинг Суми вилоятига зарба бериш учун куч тўпламоқда
Украинанинг шарқий чегараси бўйлаб Россия армияси куч тўплаётганини кўряпмиз. Бу Суми вилоятига зарба бериш истагидан далолат беради. Буни тушунамиз ва қаршилик кўрсатамиз. Истардимки, барча ҳамкорлар ҳам Путин айнан нимани режалаштираётгани, нимага тайёргарлик кўраётгани ва айнан нимани эътиборсиз қолдиришини тушунсин.
Россия кучларининг тўпланиши Москванинг келажакда ҳам дипломатияни эътиборсиз қолдириш ниятида эканидан далолат беради. Уруш Россия томонидан чўзилиши аниқ. Биз ҳамкорларимизга фронтдаги, Курск вилоятидаги ва чегара бўйлаб вазият ҳақидаги барча реал маълумотларни тақдим этишга тайёрмиз, деди у.
13 март куни Россия президенти Владимир Путин бир шарт билан Украинадаги жанговар ҳаракатларни 30 кунга тўхтатишга розилигини айтганди. Унга кўра, ушбу таклиф фақат узоқ муддатли тинчликка олиб келган тақдирдагина қабул қилинади.
Изоҳ (0)