Франция президенти Эммануэл Макрон 5 март куни телемурожаатида Россия агрессияси “чегара билмаслиги”, Европа бунга тайёрланиши кераклигини айтди. У АҚШ ким томонда эканини ҳал қилиши зарурлигини таъкидлади. Бу ҳақда The Guardian хабар берди.
Макроннинг сўзларига кўра, Европа ўз хавфсизлигини таъминлаш учун АҚШнинг аниқ позициясига таяниб қолмаслиги лозим. У зарурат туғилса, Европа давлатлари Россия таҳдидига қарши ўз кучларини мустаҳкамлаши кераклигини таъкидлади.
Бугун мен сизга халқаро вазият ва унинг Европа учун оқибатлари ҳақида гапирмоқчиман... Биламан, дунё тартибини ларзага солаётган бу тарихий воқеалар олдида сиз ҳақли равишда ташвишдасиз. Украинадаги уруш, қарийб бир миллион кишининг ўлими ва жароҳаталанганлар, бу давом этмоқда.
Иттифоқчимиз АҚШ эса бу урушга нисбатан ўз позициясини ўзгартириб, Украинани камроқ қўллаб-қувватламоқда ва келгуси воқеалар ҳақида шубҳа уйғотмоқда, деди Франция президенти мурожаатида.
Сиёсатчи ҳозирги тобора “шафқатсизлашиб” бораётган дунё “янги даврга” кираётгани, “хавфли дунёда томошабин бўлиб қолиш ақлдан эмас”лигини таъкидлади.
Макроннинг фикрича, Франция ва Европа Украинага қаршилик кўрсатишда ёрдам беришда давом этиши керак. У “Украинани ташлаб қўйиш орқали тинчликка эришишнинг имкони йўқлигини” таъкидлади. Президент Украинадаги тинчлик “ҳар қандай нархда ва Россия диктатураси остида қурилиши мумкин эмас”лигини билдирди.
Европанинг келажаги Вашингтон ёки Москвада эмас, балки Европада ўзида ҳал қилиниши лозим. Ҳа, шарқдан келаётган таҳдид яна пайдо бўлмоқда. Берлин девори қулаганидан буён ўтган 30 йиллик тинчлик даври энди тугади, деди у.
Президентга кўра, Франция ва Европа ҳам АҚШнинг божларига тайёргарлик кўриши керак ва бу қарорни “Америка иқтисодиёти учун ҳам, бизники учун ҳам тушунарсиз” деб атади.
Франция Германияга ядровий қуроллар жойлаштириши мумкин
Эммануэл Макрон Франция ихтиёрида мавжуд “тийиб туриш” қуролларидан Европа хавфсизлигини таъминлашда фойдаланишга тайёрлигини айтди. У, шунингдек, мудофаа харажатлари оширилишини таъкидлаб, буни зарурат деб атади.
Макроннинг таъкидлашича, “нима бўлишидан қатъи назар, ядро қуролидан фойдаланиш тўғрисидаги қарор ҳар доим Франция президенти қўлида бўлган ва бўлади”.
Мен Европа қитъасидаги иттифоқчиларимизни ядровий тийиб туриш ёрдамида ҳимоя қилиш бўйича стратегик мунозарани бошлашга қарор қилдим, дея эълон қилди Франция президенти.
Буюк Британия Европа иттифоқидан чиққандан сўнг, Франция ядро қуролига эга бўлган ягона иттифоқ мамлакати бўлиб қолди. Европа ҳудудида Американинг ядровий каллаклари жойлаштирилган, бироқ Дональд Трамп ҳокимиятга келганидан кейин Америка кучларини Европадан олиб чиқиб кетиш мумкинлиги ҳақидаги мунозаралар фаоллашди.
Франция “ядро клуби”нинг тўққизта давлатидан бири ҳисобланади. Стокгольм халқаро тинчлик тадқиқотлари институти (SIPRI) маълумотларига кўра, 2023 йил бошига келиб унинг арсеналида 290 та ядровий каллак бор эди.
2017 йилда Париж “Мудофаа ва миллий хавфсизлик бўйича стратегик шарҳ”ни эълон қилди. Унда ўзининг ядро сиёсатининг асосий моҳияти белгилаб берди:
- Франциянинг ядровий тийиб туриш сиёсати фақат мудофаа характерига эга;
- ядро қуролидан фойдаланиш “фақат қонуний ўзини ҳимоя қилишнинг фавқулодда шароитларида мумкин бўлади”, шу сабабли бу қуроллар “миллат хавфсизлиги, ҳимояси ва мустақиллигининг кафолати” ҳисобланади.
Изоҳ (0)