АҚШ Молия вазирлигининг Хорижий активларни назорат қилиш бошқармаси (OFAC) Россия Федерал хавфсизлик хизмати ҳузуридаги Криминалистика институти ходимлари Алексей Александров, Константин Кудрявсев, Иван Осипов ва ФХХ ходими Владимир Паняевга нисбатан санкциялар жорий қилди. Вашингтон версиясига кўра, улар россиялик мухолифатчи Алексей Навальнийнинг заҳарланишига алоқадор. Бу ҳақда 17 август куни АҚШ ғазначилик департаменти маълум қилди.
“Бугун биз Владимир Путин ва унинг режимига нафақат Украинага қарши асоссиз уруш, балки Россия халқининг инсон ҳуқуқларини бузиш оқибатлари ҳам борлигини эслатяпмиз”, — дея маълум қилди АҚШ молия вазирининг терроризмга қарши кураш ва молиявий разведка бўйича ўринбосари Брайан Нелсон.
“2020 йилда Алексей Навальнийга уюштирилган суиқасд Кремлнинг инсон ҳуқуқларига нисбатан ҳурматсизлигини кўрсатади, биз Кремлнинг манфаатини кўзлаб иш тутмоқчи бўлган шахсларни жавобгарликка тортиш учун барча ваколатлардан фойдаланишда давом этамиз”.
АҚШ Давлат департаменти виза чекловларини жорий қилмоқда
АҚШ Давлат департаменти Александров, Кудрявсев, Осипов ва Паняевларга виза чекловлари жорий қилмоқда, улар ва уларнинг оила аъзоларига АҚШга кириш тақиқланди.
Юқоридаги шахсларнинг Қўшма Штатлардаги ёки Америка шахслари назорати остидаги барча мулклари музлатилмоқда. Ушбу шахслар билан АҚШда ва Америка фуқаролари иштирокидаги барча молиявий операциялар тақиқланади.
Алексей Навальнийнинг заҳарланиши
2020 йил 20 август куни мухолифатчи Алексей Навальний Томскдан Москвага учаётган самолёт бортида ҳушини йўқотди. Икки кундан кейин комадаги Навальний Германиянинг “Шарите” (Charité) клиникасига даволаниш учун олиб кетилди. Шифокорлар унинг организмида “Новичок” асаб-фалажловчи модда изларини топди. Кейинчалик Швеция ва Франциядаги лабораториялар, шунингдек, Кимёвий қуролларни тақиқлаш ташкилоти экспертлари мустақил равишда худди шундай хулосага келди.
Тўрт нашр журналистлари Россия Федерал хавфсизлик хизмати ходимлари заҳарланишни уюштиришга урингани айтилган суриштирувни эълон қилди. Навальний ва унинг шериклари тергов ўтказишни талаб қилиб, бир неча бор Россия Тергов қўмитасига мурожаат этди, аммо уларга рад жавоби берилди. Мухолифатчи 2021 йил январида Россияга қайтиши биланоқ дарҳол қўлга олинди ва кейинчалик колонияга жўнатилди.
Изоҳ (0)