Бугунги кунгача кино ихлосмандлари асосан Голливуд фильмларига кўпроқ эътибор қаратган, чунки узоқ йиллар давомида фақат хорижий фильмлар муносиб лойиҳалар устида ишлайди, деб ҳисобланган. Аммо ҳозирда ушбу назария ҳақиқатдан йироқдир. Бунинг исботи тариқасида Қозоғистон фильмларини мисол келтириш мумкин. Қардош халқ режиссёрлари бир неча йиллардан буён ўзининг юксак маҳоратини ажойиб фильмлари орқали намоён қилиб келмоқда.
“Дастур” (2023)
Муҳим ижтимоий мавзудаги мистик драма
Жамиятда обрў-эътибор қозонган Нурсултон Кўпжасарулининг қишлоқдаги барча фермер хўжаликлари эгаси экани боис, ёлғиз ўғил Болатнинг ёмон тарбияси туфайли бир нечта муаммога дуч келади. Унинг ўғли чекка қишлоқлардан бирида яшовчи, дўмбира чаладиган қиз — Диананинг эътиборига тушишга ҳаракат қилади. Бунинг уддасидан чиқолмай, у жаҳл устида қизнинг номусига тегади. Афсуски, Диананинг қаршиликларига қарамай, унинг ота-онаси ўша шафқатсиз йигитга турмушга беради. Турмушнинг илк кунларидан бошлаб ёш келиннинг ҳаётида даҳшатли воқеалар содир бўла бошлайди.
“Дастур” жамоатчилик фикри, эскирган урф-одатлар ва зўравонлик ҳақидаги даҳшатли, драматик фильм.
“Чол” (2012)
Эрнест Хемингуэйнинг “Чол ва денгиз” ҳикояси асосида суратга олинган фильм
Бош қаҳрамон ўзининг кичик оиласи ва набиралари билан ҳозирги Қозоғистоннинг чекка қисмида кун кечиради. Кунларнинг бирида оиланинг кекса бошлиғи яйловга қўй ҳайдаб кетади, лекин даштда адашиб қолади. Уйга йўлни излаб, у бир гуруҳ бўриларга дуч келади. Бу вақтда унинг яқинлари аллақачон ёрдамга шошилади.
Қозоқ режиссёри Эрмек Турсуновнинг ушбу фильми турли авлодлар ўртасидаги мулоқотнинг аҳамияти ҳақида ҳикоя қилади.
“Тўмарис” (2019)
2019 йилда режиссёр Акан Сатаев томонидан суратга олинган бўлиб, унда массагетлар маликаси Тўмарис ва аҳамонийлар давлати султони Кир II Буюк ҳақида ҳикоя қилинади. Жасур Тўмарис ёшлигидан она меҳрини билмайди ва отасидан эрта айрилади. У душманларидан қасос олиш ва босқинчиларни мағлуб этиш учун ўзида катта куч топиши керак бўлади.
Фильм қадимги юнон тарихчиси Геродотнинг асари асосида яратилган.
Изоҳ (0)