Германия фуқаролигига ҳам эга бўлган эронлик Жамшид Шармаҳд Эрон қамоқхоналаридан бирида қатл этилди. Бу ҳақда Al Jazeera хабар берди.
Маҳкум 28 октябрь куни тонгда қатл қилинган. Эронда ўлимга ҳукм одатда осиб ўлдириш орқали амалга оширилади. Ҳуқуқ ҳимоячилари ва айниқса Шармаҳднинг АҚШда яшовчи қизи маҳкумни қутқариш учун охиригача курашган.
Шармаҳднинг қариндошларига кўра, у сўнгги бир неча йил мобайнида АҚШда истиқомат қилган ва 2020 йилда Дубайда самолёт алмаштираётган пайтда Эрон махсус хизмати ходимлари томонидан олиб кетилган. Икки фуқароликни тан олмайдиган Эрон уни “мураккаб операциядан” сўнг ҳибсга олганини эълон қилган, лекин қандай, қаерда ва қачон ушлангани очиқланмаган.
Теҳрон уни Эронда террористик ташкилот сифатида тан олинган “Тондар” номли мухолиф гуруҳнинг етакчиси деб билади. Шармаҳд 2008 йилдаги портлаш ва Эрондаги бошқа ҳужумларни режалаштиришда айбланган. 2023 йилда “Ер юзидаги коррупция” айби билан ўлим жазосига ҳукм қилинган.
“Эркак 2020 йилдан бери қамоқда сақланган ва шу вақт мобайнида ўзи танлаган адвокатдан фойдаланиш имкониятига эга бўлмаган”, деб таъкидлади Европа иттифоқи.
Бундан ташқари, Эрон ҳукумати Шармаҳднинг Германия фуқаролиги мавжудлигига қарамай, унга консуллик хизматидан фойдаланиш имкониятини рад этгани айтилган.
Германия муносабати
Германия ташқи ишлар вазири Анналена Бербок қатлни қоралади. У масалани ҳал қилиш учун юқори даражадали гуруҳ Эронга бир неча бор юборилганини айтди.
“Жамшид Шармаҳднинг ўлдирилиши Теҳронда қандай ғайриинсоний режим ҳукмронлигини яна бир бор кўрсатади: ўз ёшларига, ўз аҳолисига ва чет эл фуқароларига қарши ўлимдан фойдаланадиган режим. Биз Теҳронга немис фуқаросининг қатл этилиши жиддий оқибатларга олиб келишини бир неча марта билдирганмиз”, деди у.
Апрель ойида Эрон Олий суди Шармаҳдга нисбатан террорчиликда айблаб чиқарилган ўлим ҳукмини ўз кучида қолдирган.
Изоҳ (0)