АҚШ ҳарбий-ҳаво кучлари ядровий уруш учун янги самолётлар флотини яратади. Бу ҳақда Reuters хабар берди.
Хабарга кўра, гап “қиёмат самолётлари” ҳақида кетмоқда. Бундай авиатехникалар экипаж ва йўловчиларни атом бомбаси портлашидан ҳимоя қилишга қодир. Boeing корпорацияси танловдан четлаштирилган, шунинг учун шартнома Sierra Nevada Corp’га ўтиши мумкин.
АҚШ ҳарбий-ҳаво кучлари 2024 йилда янги “қиёмат куни самолётлари”ни яратиш бўйича шартнома имзолашни режалаштирмоқда. Бироқ Пентагон бошқа компаниялардан таклиф олган ёки олмагани ҳақида изоҳ бермаяпти. Бугунги кунда АҚШда “қиёмат куни самолёти” E-4B Nightwatch ҳисобланади. Унинг хизмат қилиш муддати 2030 йилда тугайди.
Режага кўра, 2024-молия йилида “қиёмат куни самолётлари” флотини ривожлантириш учун 889 миллион доллар сарфлаш кўзда тутилган. 2028 йилгача дастур учун яна 8,3 миллиард доллар ажратилади. Ҳозирда E-4B Nightwatch АҚШ мудофаа вазирини ташиш учун ишлатилади. У мобил қўмондонлик пости сифатида яратилган. Самолёт ядро портлашлари ва электромагнит таъсирларга бардош бера олади. АҚШда тўртта E-4B самолёти мавжуд, аммо улардан фақат биттаси доимий ишлайди.
E-4B самолётлари ёнилғи билан тўлдирилган бўлса, бир ҳафтагача осмонда қолиши мумкин. Бортдаги барча жиҳозлар ядровий портлашнинг зарарли омилларидан ҳимояланган. Бортда бир вақтнинг ўзида юзлаб одамлар бўлиши мумкин.
Изоҳ (0)