АҚШнинг Калифорния штатида самолёт тижорат биносига қулаши оқибатида икки киши ҳалок бўлди, 18 киши жароҳатланди. Бу ҳақда BBC хабар берди.
Ўн киши тан жароҳати билан шифохонага етказилган. Қолган 8 киши ёрдам кўрсатилгач, қўйиб юборилган. Федерал Авиация маълумотларига кўра, бир двигателли Ванъс РВ-10 самолёти ҳалокатга учраган. Расмийлар ҳалокат қандай содир бўлгани ҳақида қўшимча маълумот бермаган. Ҳалок бўлган икки киши ишчи бўлганми ёки самолёт бортидагиларми, номаълум.
Полиция ҳудуддаги бинолардан одамларни эвакуация қилмоқда ва ҳалокат содир бўлган жойдан узоқроқда туришни сўрамоқда.
Конгрессмен Лоу Корреа самолёт қулаган бино мебел ишлаб чиқариш бизнеси эканини айтди. У жароҳатланганларнинг аксарияти завод ишчилари бўлганини таъкидлади. Авиаҳалокат оқибатида ёнғин ҳам келиб чиққан ва у ўт ўчирувчилар томонидан ўчирилган.
Бу сўнгги икки ой ичида ҳудудда ҳалокатга учраган иккинчи самолётдир. 25 ноябрь куни яна бир самолёт авиаҳалокат юз берган ҳудуддан тахминан бир блок узоқликда дарахтга қулаб тушганди. Ушбу ҳалокатда жиддий жароҳатлар қайд этилмаган.
Бу самолёт иштирокида 10 кун ичида юз берган бешинчи хавфли ҳодисадир. Аввалгилари:
♦ 25 декабрь куни Қозоғистоннинг Оқтов шаҳрида юз берди. Озарбайжон самолёти қулаши оқибатида 38 киши ҳалок бўлди, 29 киши омон қолди. Авиатехника кўздан кечирилганида тешиклар аниқланди. Озарбайжон президенти самолёт Грозний яқинида ўққа тутилгани, бу самолётни ишдан чиқарганини айтди. Илҳом Алиев Россиядан узр сўраш, айбдорларни жазолаш ва компенсация тўлашни талаб қилди.
♦ 29 декабрь куни Жанубий Кореяда Бангкокдан Муанга парвоз қилаётган Jeju Air авиакомпаниясининг Boeing 737-800 самолёти белгиланган аэропортга қўнаётганда ёниб кетди. Ҳодиса оқибатида 179 киши ҳалок бўлди, икки киши омон қолди. Ҳолат юзасидан Кореяда 7 кунлик мотам эълон қилинди.
♦ 29 декабрь куни Boeing 737-800 самолёти Осло шаҳрига фавқулодда қўнишни амалга оширди. Амстердамга учаётган самолёт гидравликасида носозлик юз берган. Самолёт Осло аэропортига қўниш чоғида учиш-қўниш йўлагидан чиқиб кетиб, ўтлар устида тўхтаган. ОАВ ҳеч ким жабрланмагани, йўловчилар эвакуация қилингани ҳақида ёзмоқда.
♦ 29 декабрь куни БААда Jazirah Aviation Club авиакомпаниясига тегишли енгил моторли самолёт денгизга қулаб тушди. Авиаҳалокат оқибатида учувчи ва ҳамроҳи ҳалок бўлган.
Изоҳ (0)