Филаделфияда тез тиббий ёрдам самолёти ҳалокатга учради. Самолёт бортида бўлган олти кишининг барчаси ҳалок бўлган, деб хабар бермоқда BBC.
Самолёт Филаделфия шимоли-шарқида ҳавога кўтарилганидан кўп ўтмай қулаб тушган. Ҳалокатга учраган Learjet 55 самолётига эгалик қилган тез тиббий ёрдам компанияси бортда тўрт нафар экипаж аъзоси, бир бемор ва бир шифокор бўлганини маълум қилди.
"Биз ҳозирда тирик қолганлар борлигини тасдиқлай олмаймиз", дейилади Jet Rescue Аir Ambulance баёнотида.
Маҳаллий ОАВ маълумотларига кўра, фалокат маҳаллий вақт билан соат 18:30 атрофида Рузвельт савдо маркази яқинида содир бўлган.
Филаделфия мэри Шерел Паркер воқеа жойидан ўтказган матбуот анжуманида самолёт қулаган жойда бир неча уй ва машина ёнаётганини айтди.
Тез тиббий ёрдам самолёти Миссури штатидаги Спрингфилд-Брансон шаҳрига йўл олаётган бўлган. Ҳалокат сабаблари ҳозирча номаълум.
Бу АҚШда бир ҳафта ичидаги иккинчи самолёт ҳалокатидир. 30 январь куни Вашингтон осмонида самолёт ва ҳарбий вертолёт тўқнашиб кетганди. Ўша воқеа оқибатида жами 67 киши ҳалок бўлди.
Изоҳ (0)