Чорсу “Овқат бозори” — Тошкентнинг эски шаҳар руҳини ўзида жамлаган, доимий шовқин-сурони, тутун ва таом ҳиди билан яшайдиган жонли маскан. Кириш қисмидан кабоб тутуни ҳавога таралади, пештахталар ортида йиллар, баъзан авлодлар давомида шу ерда ишлаган ошпазлар туради. Бозор ҳашаматдан йироқ: қуёшда хиралашган баннерлар, эскирган кўрпачали стол-стуллар бор. Аммо бу ернинг асосий бойлиги — таомлар мазаси ва самимий муҳит. Палов, сомса, кабоб, лағмон, шўрва, норин ва хоним каби миллий таомлар пиширилади, ҳар бирида йиллар давомида сайқал топган сир ва “бир чимдим меҳр” бор.
Чорсу “Овқат бозори” — бу нафақат овқатланиш жойи, балки авлодлар оша давом этаётган ошпазлик мактабидир. Бу ернинг доимий харидорлари “Азиза опа сомсалари”ни жуда яхши билишади. Атайин шаҳарнинг турли бурчакларидан бу таъмни ҳис қилиш учун келадиганлар ҳам бор. Хўш, бу сомсанинг машҳурлик сири нимада? “Дарё” ижодкорлари 34 йилдан буён бу бренд номини сақлаб келаётган Қодировлар оиласи билан танишди.
Азиза опа ким? Бу савол кўпчиликни ўйлантирса керак. Айни кунларда ота касбини давом эттираётган кичик тадбиркор Абдулазиз Қодиров унга қуйидагича жавоб берди.
— Азиза бувим ҳозир 74 ёшдалар, энди оилавий бизнесни биз ёшлар давом эттиряпмиз. 1991 йили дадам ва амаким сомсапазга шогирд тушишган, устозларининг дуосини олиб, уйнинг бир чеккасида тандир қуриб, сомса ёпишган. Бувим фарзандларига кўмаклашиш учун уни бозорга олиб чиқиб сотган экан. Сомсанинг таъми одамларга манзур бўлиб, “Исмингиз нима? Сизни бозордагилардан нима деб сўрасам бўлади?”, дейишган экан. Шундан кейин у Азиза опа сомсалари деб одамлар орасида танилган, дейди Абдулазиз Қодиров.
34 йилдан буён ҳар куни тандир-тандир сомса сотилади. Унинг нархи ҳам у қадар арзон эмас. Сомсанинг шу даражада талабгорлигининг сири нимада?
— Ҳеч қандай сири йўқ. Ҳаммаси жуда оддий, менимча, дуода гап кўп, деб биламан. Чунки дадамнинг айтишича, устозлари шу ҳовлида дуо қилган экан, шу боисданми, бу ерда қилинган сомсанинг талабгорлари кўп бўлади. Тадбиркорликни ривожлантириш учун бошқа ерлардан ҳам сомсахоналар очмоқчи бўлдик, аммо натижа кутилганидек бўлмади. Кейин ҳамиша сархил гўшт ишлатамиз, 10 йилдан бери битта қассоб билан ишлаймиз. Ёғсиз, яхши пишадиган гўштдан оламиз. Хамирларни олдиндан музлатиб қўймаймиз, шу кунгача бундай гўштдан ҳам фойдаланганимиз йўқ, дейди Абдулазиз Қодиров.
Азиза опа сомсаларининг бир донаси 25 минг сўм. Унинг қимматлиги хўрандалар эътирозига сабаб бўлмаганми?
— Тўғри, қиммат, аммо бу пулнинг тенг ярми гўшт олиш учун кетади. Чунки ҳар бир сомсага 90 гр дан гўшт соламиз. Бир килограмм гўштни 140 минг сўмга олсанг, ундан 10-11 та сомса чиқади. Бошқа турдаги сомсаларни ҳам қилиб кўрдик. Аммо мижозларимиз гўштни севувчи инсонлар экан, савдоси у қадар юришмади. Кунига 600 тага яқин сомсани савдога чиқарамиз. Доимий мижозларимиз бор, уларнинг кўпчилигини ёши катта инсонлар ташкил қилади. Улар шу қадар содиқки, ҳатто, уларнинг тахминий нечанчи санада келишларини ҳам биламиз. Чунки нафақат пулларини олдик, деб келишади. Ҳар ой АҚШ ва Европага ҳам музлатилган ҳолда жўнатиб берамиз. Телефон қилиб, “шу таъмни соғиндик”, дейдиганлар жуда кўп, дейди Қодиров.
Суратга олиш пайтида хорижлик хўрандаларни ҳам кўрдик. Кўз тегмасин, уларнинг қадами узилмаяпти. Филиппин, Таиланд, Россия, Туркия энг яқини қўшни Қозоғистондан келишибди. Улар билан инглиз ва рус тилида эркин гаплашаётган Абдулазиз Қодиров хорижлик мижозлар сабаб тил ўргангани ҳақида гапирди.
— “Овқат бозори” туристик зона деса ҳам бўлади. Ҳар куни келишади, ўзбек миллий таомларини ейишади. Савдо қилаётганда улар билан гаплашиш, нафақат нархи, балки таркиби ҳақида ҳам маълумот бериш керак. Шу боис, инглиз тилига курсига қатнаб, тилни ўргандим. Сомса ҳақида уларнинг фикри турлича. Айримларга ёқади, айримлари эса “жуда ёғли экан”, дейишади. Чунки хорижликлар қайнатилган ёки димлаб пиширилган таомларни ейишади. Ёғли сомсалар уларнинг ошқозонига оғирлик қилиши мумкин, дейди Абдулазиз Қодиров.
Қуйидаги ҳавола орқали видеони тўлиқ ҳолда томоша қилишингизни ва фикрларингизни ёзиб қолдиришингизни сўраймиз.
Дарвоқе, сизда ҳам бу бизнес билан шуғулланиш фикри пайдо бўлган бўлса, албатта, видеони томоша қилинг. Чунки унда сомсадан қандай қилиб даромад топиш мумкинлиги ҳам айтиб ўтилган. Бизнес ғоя бор, озгина ғайрат қилсангиз бўлди.
Наргиза Муродова
Изоҳ (0)