Хитойда ажрим бўйича суд ишларидан бирида аёл собиқ турмуш ўртоғидан рўзғор юмушларини бажариб келган йиллари учун 7 минг доллар миқдорда пул сўради. Суд унга беш баравар кўпроқ миқдорда товон пули тайинлади. Бу ҳақда The China Morning Post нашрига таяниб “Правила жизни” хабар берди.
Эр-хотиннинг ажрим жараёни 2024 йил охирида бошланган. Маълум бўлишича, улар 2011 йилда турмуш қурган ва маълум вақтдан сўнг қиз фарзандли бўлган. Жуфтлик 2022 йил октябрь ойида фарзандининг таълим олиши мавзусида қаттиқ баҳслаша бошлаган.
Ажрим тўғрисидаги аризасида Ху исмли аёл қизига васийлик қилиш ҳуқуқини олиш, умумий мулкни тенг миқдорда бўлишишдан ташқари, никоҳ даврида бажарган барча уй ишлари учун 7000 доллар товон пули тўлашни талаб қилган. Бунга сабаб сифатида аёл бирга яшаган вақтларида ҳеч ким унга ёрдам бермагани ҳамда барча уй юмушларини бир ўзи бажарганлигини айтган.
Суд жараёнида “Уйдаги барча ишлар эр-хотин ўртасида тенг тақсимланиши керак”, деди судья ёрдамчиси. Чунки Хитойнинг фуқаролик кодексига кўра, никоҳда бўлган томонлардан бири фарзандларга ғамхўрлик қилишда кўпроқ иш ва масъулиятни ўз зиммасига олса, ажрим вақтида иккинчи томон унга моддий ёрдам бериши шарт. Шунинг учун аёлга қонунга мувофиқ тарзда 35 минг доллар товон пули тайинланди ва қарорга ҳеч ким эътироз билдира олмайди.
Изоҳ (0)