Хитойнинг шарқий қисмида жойлашган Тянсу провинциясида яшовчи аёл ўзининг ҳомиладор эканлигини бола 34 ҳафталик бўлганидагина билди. Бу хабардан бир кун ўтиб, унда тўлғоқ бошланди ва ўғил фарзанд дунёга келди. Бу ҳақда South China Morning Post нашрига таяниб “Правила жизни” хабар берди.
Ўз юртида Тинг Тинг тахаллуси билан гўзаллик ва мода мавзуларидаги блогер аёл уйида смартфондаги ўйинни ўйнаб ўтирган вақтда қон йўқота бошлаган. Сўнг касалхонага борганида шифокорлар унинг ҳомиладорлиги ҳақида хабар беришган. Ҳомила эса 34 ҳафталик бўлган.
“Мен чақалоқнинг юрак уришини эшитмагунимча шифокорларнинг гапига ишонмадим”, дейди блогер.
Эртаси куни эрталаб у онаси билан клиникага қайта кўрикка келади, маълум вақт ўтгач шифокорлар унга яқин орада туғруқ бошланиш эҳтимоли борлигини айтади. Ўша куни кечқурун кесарча усули билан чақалоқ дунёга келади.
Аёл ўзининг ҳомиладор бўлганини тасаввурига ҳам сиғдира олмаган, чунки бундан аввал у мунтазам ҳайз кўрган ҳамда ҳомиладорлик белгилари — кўнгил айниши, қориннинг катталашиши кабиларнинг бирортаси намоён бўлмаган. Аёл ҳатто ҳомила ҳаракатини ҳам сезмаган.
Бундан ташқари, ўтган бир неча ой давомида у уч маротаба ҳомиладорлик тестини ўтказган ва барча натижалар манфий бўлган. Шу сабабли аёл саломатлигидан хавотир олмай, одатдаги ҳаётини давом эттирган. У мунтазам кеч ухлашга ётар, тез-тез чекар ва қаҳва истеъмол қилар эди:
“Мен кундалик стрессдан фориғ бўлиш учун ҳомиладорларга мумкин бўлмаган маҳсулотларни истеъмол қилганман. Боламни кўрганимда эса хаёлимга биринчи келган хавотир — бу унинг саломатлигини текшириш ва ғамхўрлик қилиш эди. Аввалги масъулиятсиз ва хавфли кун тартибим учун ўзимни айбдор ҳис қила бошладим”, деди у.
Ҳомиладорликнинг биринчи ҳафталарида у фаол турмуш тарзини кечирган: у дўстлари билан баландликдан сакраган ва хавфли аттракционларда учган.
“Ҳомиладорлигимда қилган ажабланарли амалларимни бажармаслик учун вақтни орқага қайтаришни истайман”, деди блогер.
Чақалоқ дунёга келгач, у неонатал интенсив терапия бўлимига юборилган. Орадан ўн кун ўтгач, бола бутунлай соғлом ҳолатда касалхонадан чиқарилган. Онанинг сўзларига кўра, унинг ўғли ҳозирда ўзини яхши ҳис қилмоқда ва соғлиғидан ҳеч қандай шикоятлари йўқ.
Изоҳ (0)