“Сумерки” фильми ва “Яхши аломатлар” сериали юлдузи, уэлслик актёр Майкл Шин 900 нафар ватандошларининг 1 миллион фунт стерлинг (деярли 1 миллион 290 минг АҚШ доллари) миқдорда қарзларини тўлаб берди. Ушбу суммадан 100 минг фунт стерлинг қисми актёрнинг шахсий маблағидир.
Шин 100 минг фунт стерлинг билан молиявий қийинчиликларга дуч келган одамларга ёрдам бериш учун махсус фонд ташкил қилган. Унинг эзгу амали яқинда премераси бўлиб ўтадиган “Майкл Шиннинг миллион фунтлик лотереяси” номли ҳужжатли фильм учун асос бўлди.
“Энг ҳайратланарлиси, одамлар ҳашаматли буймларни эмас, балки ҳаёт учун зарурий нарсаларни сотиб олиш учун кредит олишган ва овердрафтлардан фойдаланишган. Мен тўлай олган қарзлар ичида автокредит, уй кредити ҳамда овердрафтлар ўрин олган”, деди Шин The Hollywood Reporter нашрига.
Актёр кам таъминланган аҳоли қатламининг молиявий аҳволидан хавотирда эканини ҳамда инсонлар истамаган ҳолда кредитлар тузоғига тушиб қолаётганини қайт этди. Унинг BBC нинг The One Show дастурига берган интервьюсида айтишича, қарзларни тўлаб берувчи компания яратиш лойиҳаси имкон қадар самарали бўлиши муҳим бўлган:
“Одамларнинг қарзлари махсус пакетда бирлаштирилади, сўнг қарз олувчи компаниялар бу пакетларни сотиб олади. Кейинроқ уларни бошқа қарз олувчи компанияларга арзонроқ нархда сотиш мумкин бўлади. Шу тарзда қарздорлар сони ўзгармай қолса ҳам, қарзга эгалик қилувчилар уни ҳар сафар янада камроқ пулга сотишлари мумкин бўлади”, деди актёр.
“Қарздан қутулиш ниҳоятда қийин масала. Шунинг учун мен ушбу глобал муаммо мавжудлигини инсонларга билдириш ҳамда уни ҳал қилиш мумкинлигини кўрсатиш учун ушбу лойиҳани ўз бўйнимга олдим. Биз ҳаммамиз вазиятни яхши томонга ўзгартиришга ҳаракат қилдик”, дея қўшимча қилди Шин.
Майкл Шин хайрия ишларига муккасидан кетган актёрлардан, бу иши уни бир вақтлар уни деярли банкротликка олиб келган. 2019 йилда актёр Буюк Британия ва АҚШдаги кўчмас мулкларини сотиб, Уэлсдаги кам таъминланган болалар учун футбол чемпионати ўтказиб берган.
Изоҳ (0)