Бразилиялик 105 ёшли Маноэл Ангелим Дино ва 101 ёшли Мария де Соуза Дино бугунги кунда яшайдиган оилалар ўртасида биргаликда энг узоқ умр кечирган жуфтлик сифатида рекорд ўрнатди. Бу ҳақда Гиннеснинг рекордлар китоби расмий сайтида хабар берилди. Эр-хотин 84 йил-у икки ой бирга яшаган.
“Улар 1940 йилда Бразилиянинг Сеaра шаҳридаги Boa Ventura ибодатхонасида турмуш қуришган. Ўша даврлар ҳозиргидан бутунлай ўзгача эди. Масалан, биринчи дастурлаштириладиган компьютер ҳали ихтиро қилинмаган, Бразилия эса ҳали бирорта ҳам жаҳон чемпионатида ғолиб чиқмаган эди!”, дейилади Гиннеснинг рекордлари сайтида.
Маноэл ва Мария 1936 йилда қишлоқ хўжалиги соҳасида ишлаётган пайтда танишган. Маноэл бўлажак рафиқаси яшайдиган шаҳарга анъанавий Бразилия ширинликлари — рападуралар партиясини олиб кетиш учун ташриф буюрган. Орадан тўрт йил ўтгач, улар тасодифан яна учрашиб қолишган ва бир-бирига кўнгил қўйган.
Дастлаб Мариянинг онаси бу муносабатларга қарши бўлади, шу сабабли Маноэл нияти жиддий эканлигини исботлаш учун бўлажак оиласи учун уй қура бошлади. Сўнг иккала оила розилиги билан Маноэл ва Мария 1940 йилда турмуш қуришди ва ўзлари барпо этган уйда яшай бошлади. Оиласини боқиш учун Маноэл тамаки етиштириб, сотар эди.
Эр-хотин 13 нафар фарзандни вояга етказди, ҳозирда уларнинг 55 набираси, 54 эвараси ва 12 та чевараси бор. Улар асосий вақтини дам олиш ва биргаликда ибодат қилиш билан ўтказади.
Фото: Guinness World Records
Улардан мустаҳкам турмуш сири нимада, деб сўрашганда Мария қисқагина “Муҳаббат”, дея жавоб беради.
Фото: Guinness World Records
Яқин тарихда энг узоқ вақт бирга никоҳда яшаган оила сифатида 19-асрда яшаб ўтган Девид Жейкоб Ҳиллер ва Сара Дейви Ҳиллер қайд этилган. Эр-хотин 1898 йилда Сара вафот этгунга қадар 88 йил-у 349 кун давомида бирга ҳаёт кечирган.
Изоҳ (0)