108 ёшли япониялик Шицуи Хакоиси сартарош бўлиб ишлаётган дунёдаги энг кекса аёл деб тан олинди. У 90 йилдан ортиқ умри давомида ўзининг севимли касби билан шуғулланган. Бу ҳақда Гиннеснинг рекордлар китобининг расмий сайти хабар қилди.
Хакоиси сартарошлик касбни 14 ёшидан ўргана бошлаган.
“Мен ўзимдан каттароқ шогирдларни иложи борича тезроқ ортда қолдириб, улардан қобилиятим билан ўзиб кетишни истар эдим, шунинг учун жуда кўп ишладим ва қўлимдан келганча меҳнат қилдим”, дея эслайди у.
Хакоиси расман 1936 йилда сартарошлик лицензиясини олгач, профессионал сифатида ишлай бошлади. Уч йил ўтгач, аёл ва унинг турмуш ўртоғи биргаликда ўзларининг гўзаллик салонини очди. Бироқ сартарошхона фаолияти узоқ давом этмади ва иккинчи жаҳон уруши пайтида уларнинг биноси вайрон бўлди.
Орадан узоқ йиллар ўтгач, икки фарзандининг тарбияси билан шуғулланаётган Хакоиси янги сартарошхона очишга қарор қилди. Афсуски, унинг турмуш ўртоғи урушда вафот этган эди.
Шицуи хоним ўз ишини янада ривожлантиришда давом этмоқда. У мижозларга хизмат кўрсатиш билан бирга иш жараёнларини бошқаради. Аммо кекса аёлнинг тиззасидаги чидаб бўлмас оғриқлар туфайли ўзи истагандек кўпроқ ишлай олмайди.
Унинг фикрича, узоқ умр кўришга фаол ҳаёт тарзи сабаб бўлган. Хакоиси 70 ёшидан бери қатъий жисмоний машқлар ва парҳез режимига амал қилади.
“Баъзилар мени кўриш учун узоқдан ташриф буюради, шунинг учун мен имкон қадар фаолиятимни давом эттиришни истайман”, дейди рекордчи.
Изоҳ (0)