Россия Украинадаги ҳарбий ҳаракатларни тўхтатишга тайёр, аммо бу фақат узоқ муддатли мустаҳкам тинчликка олиб келиши шарт. Бу ҳақда 13 март куни Россия президенти Владимир Путин Беларусь президенти Александр Лукашенко билан ўтказилган қўшма матбуот анжуманида маълум қилди.
Биз жанговар ҳаракатларни тўхтатиш бўйича таклифларга розимиз, аммо бу тўхтатиш узоқ муддатли тинчликка олиб келадиган ва ушбу инқирознинг асл сабабларини бартараф этадиган бўлиши керак, деди Путин.
Украинанинг жанговар ҳаракатларни тўхтатишга тайёрлигини шарҳлаган Путин шундай деди: “Биласизми, Саудия Арабистонидаги Америка—Украина учрашуви бу ташқи кўринишдан Украина томонининг Америка босими остида қарор қабул қилганига ўхшаши мумкин. Аслида, ишончим комилки, Украина томони ҳозиргина айтиб ўтилганидек, жойлардаги вазиятдан келиб чиқиб, америкаликлардан буни қатъий равишда сўраши керак эди”.
“Ғоянинг ўзи (ярашиш ҳақида) тўғри. Ва биз, албатта, уни қўллаб-қувватлаймиз, лекин муҳокама қилишимиз керак бўлган масалалар бор”, дейди Путин.
Шунингдек, у бир қатор аниқ саволларни кўтарди, хусусан, Курск вилоятидаги Украина қуролли кучларининг мағлуб бўлмаган бўлинмалари билан нима қилиш кераклиги ҳақида:
“Биз тинч аҳолига қарши шунча жиноятлардан сўнг қуролли кучларни Курск вилоятидан чиқариб юборишимиз керакми? У ерда Курск вилоятидаги УҚК учун икки йўл бор: асирга тушиш ёки ҳалок бўлиш”.
Путиннинг таъкидлашича, Россия 30 кунлик сулҳ даврида “Украина сафарбарлик ўтказмаслиги, аскарларни тайёрламаслиги ва қурол олмаслиги” ҳақида кафолат олиши керак.
“Ўйлайманки, биз америкалик ҳамкасбларимиз, ҳамкорларимиз билан бу борада гаплашишимиз, балки президент Трамп билан қўнғироқлашиб, у билан биргаликда муҳокама қилишимиз керак. Аммо биз бу можарони тинч йўл билан тугатиш ғоясини қўллаб-қувватлаймиз”, деб таъкидлади у.
Россия раҳбари жаҳон етакчиларининг Украинадаги ҳарбий ҳаракатларни тўхтатишга ёрдам беришга интилишини олийжаноб вазифа деб атаган.
Президент сўзининг якунида можарони тинч йўл билан тўхтатиш ғоясининг ўзи тўғри эканлигини, бироқ у президент Трамп билан муҳокама қилиши керак бўлган кўплаб масалалар борлигини таъкидлади.
“Назорат, текшириш масалалари қандай ҳал қилинади? 2 минг километр масофада ким нимани бузганини ким аниқлайди? Ўт очишни тўхтатиш буйруғини ким беради? Соғлом фикр нуқтайи назаридан бу ҳаммага тушунарли, бу жиддий масалалар. Буларнинг барчаси ҳар икки томондан синчковлик билан ўрганишни талаб қиладиган масалалардир”.
Изоҳ (0)