Кремль Жиддада АҚШ ва Украина ўртасидаги музокараларда илгари сурилган таклифларни ўрганмоқда ва Вашингтон Москвага учрашув тафсилотлари ҳақида ахборот беришига умид қилмоқда. Бу ҳақда Россия Федерацияси президентининг матбуот котиби Дмитрий Песков чоршанба куни ўтказилган брифингда маълум қилган.
“Биз натижалар бўйича берилган баёнотларни диққат билан ўрганяпмиз, қабул қилинган қўшма баёнот матни билан танишяпмиз. Кеча Жиддада айтилганидек, давлат котиби Рубио ва миллий хавфсизлик бўйича ёрдамчи Уолтц шу кунларда турли каналлар орқали ўтказилган музокаралар тафсилотлари ва эришилган келишувлар ҳақида бизга маълумот беришига умид қиляпмиз”, деган Песков.
Песковнинг таъкидлашича, Кремль шу кунларда америкаликлар билан алоқа ўрнатган бўлиб, бу жараёнда маълумотларнинг тўлиқ бўлишига ишонади.
У яқин келажакда Россия ва АҚШ ўртасида “олий даражадаги телефон суҳбати мавзуси” кўтарилиши мумкинлигини истисно этмади.
“Агар шундай эҳтиёж туғилса, у жуда тез ташкил этилади. Америкаликлар билан мавжуд мулоқот каналлари буни етарлича қисқа муддат ичида амалга ошириш имконини беради”, дея қўшимча қилган у.
Унинг аниқлик киритишича, телефон суҳбати бўйича келишувлар юзасидан Вашингтон томонидан сўров ҳали мавжуд эмас.
Маълумот учун, Саудияда АҚШ—Украина делегациялари ўртасидаги учрашув 9 соат давом этди. Якунда Украина 30 кунлик ўт очишни тўхтатиш таклифини қабул қилган, лекин аввал Россия рози бўлиши кераклиги айтилганди.
Изоҳ (0)