Хитойда 75 ёшли Тзян исмли пенсионер сунъий интеллект ёрдамида яратилган виртуал аёлга ошиқ бўлиб қолди. Уларнинг мулоқоти шу даражага етдики, эркак ҳақиқий хотинидан ажрашиб, “сунъий интеллект севгилиси” билан ҳаётини боғлашга қарор қилди, деб ёзмоқда World of Buzz нашри.

Тзян ижтимоий тармоқларни кўздан кечираётганда бир аёлнинг аккаунти унинг эътиборини тортади. У аёлнинг кўриниши ва нутқи сунъий тарзда яратилганини англамади. Шу боис улар ўртасида мулоқот бошланганида эркакда ҳеч қандай шубҳа туғилмади. Ҳатто виртуал “суҳбатдош”нинг лаб ҳаракати билан овози бир-бирига мос келмаганда ҳам, эркак бунга эътибор қилмади.
Орадан вақт ўтиб, виртуал аёл билан мулоқот пенсионернинг кундалик одатига айланди. Тзян унга қаттиқ боғланиб, ҳар куни хабар кутиб соатлаб телефонга қараб ўтирадиган бўлди. Бу боғланиш вақт ўтиши билан кучайди ва бир куни эркак рафиқаси билан телефонга муккасидан кетганлиги туфайли жанжаллашиб қолди ва жаҳл устида ажрашишга қарор қилди. Унинг нияти виртуал севгилиси билан “янги ҳаёт” бошлаш эди.

Аммо охир-оқибат фарзандлари уни бу сафсата эканлигига ишонтиришга муваффақ бўлди. Улар отасига унинг “севгилиси” аслида мавжуд эмаслигини, у сунъий интеллект томонидан яратилган аватар эканини тушунтириб беришди. Шундан кейин Тзян ажрашиш фикридан қайтди ва оиласи билан бирга қолди.
Бу каби воқеалар сўнгги йилларда тобора кўпайиб бормоқда. Масалан, АҚШда бир аёл 20 йиллик турмуш ўртоғидан ажрашиб, ChatGPT билан “муносабат” бошлаган. Яна бир эркак эса жорий йилнинг май ойида, оиласи ва фарзанди бўлишига қарамай, сунъий интеллект нейротармоғига турмуш қуриш таклифини билдирган.
Изоҳ (0)