Россия ФВВ раҳбари ёрдамчиси Юрий Мезинов Курск вилоятининг Сужа ва унга яқин қишлоқларида бедарак йўқолганлар рўйхатида бўлган 100 дан ортиқ киши топилганини маълум қилди. Минтақага ҳужум бошланганидан бери Россия Қизил хоч ташкилоти (РКК) бедарак йўқолганлар ҳақида 7 мингдан ортиқ мурожаатни қабул қилган. Бу ҳақда “Коммерсант” хабар берди.
12 март куни Россия Мудофаа вазирлиги Россия армияси Курск вилоятидаги бешта аҳоли пунктини эгаллаб олганини маълум қилган. Курск вилояти губернатори вазифасини бажарувчи Александр Хинштейннинг сўзларига кўра, россиялик ҳарбийлар ва кўнгиллилар Сужа ҳудудидан 68 кишини эвакуация қилган.
Муҳими, биз топган одамларнинг 90 фоизи, яъни ҳозирги пайтда 100 дан ортиқ киши — аниқ рақамни айтолмайман, лекин 90 фоизи бизнинг бедарак йўқолганлар рўйхатимизда бор. Бу оилалар ҳозир ўз яқинларини топади. Тасаввур қиляпсизми, буларнинг барчаси ярим йилдан ортиқ вақт давомида ҳеч нарса билмаган, кўрмаган, ўз оиласидан узоқда яшашга мажбур бўлган, деди Мезинов.
9 январь куни Россиядаги инсон ҳуқуқлари бўйича вакил Татьяна Москалкова Курск вилоятининг қидирувдаги аҳолиси ҳақидаги маълумотларни ўз ичига олган ҳужжатни эълон қилди. Февраль ойи охирида Курск вилояти ҳукумати веб-сайтида вилоятнинг бедарак йўқолган аҳолиси тўғрисидаги маълумотлар реестри пайдо бўлди. Хинштейннинг таъкидлашича, тизимга 1,9 мингдан кўпроқ бедарак йўқолган шахслар киритилган.
Сужа шаҳри 2024 йил августидан бери Украина қуролли кучлари назорати остида эди. 12 март куни ижтимоий тармоқларда россиялик ҳарбийларнинг шаҳар марказий майдонида бемалол ҳаракатланаётгани акс этган видеолар тарқалди. Сужанинг озод этилгани ҳақида ҳали расмий хабар берилмаган.
Изоҳ (0)