Россия президенти Владимир Путин Курск вилоятига келиб, фронтдаги вазият билан танишди. Бу Украина кучлари 2024 йилнинг 14 август куни мазкур йўналишда ҳужумга ўтганидан бери илк ташрифдир.
Кремль томонидан эълон қилинган кадрларда унинг Курск вилоятидаги қўмондонлик марказига ҳарбий формада келгани, у ерда Путинни Россия қуролли кучлари Бош штаби раҳбари Валерий Герасимов кутиб олгани акс этади.
Бизнинг бирламчи вазифамиз — Курск вилоятига ўрнашиб олган ва ҳануз ҳимояда турган душманни бутунлай тор-мор этиш ва ҳудудни тўлиқ озод қилишдир, деди Путин Россия ҳарбий раҳбариятига мурожаат қилиб.
Шу билан бирга, Россия президенти Курск ҳудудида қўлга олинган украиналик аскарларни “террорчилар” сифатида кўриш лозимлигини таъкидлади.
Курск вилоятида тинч аҳоли ва ҳарбий кучларимизга қарши жиноятлар содир этаётган кишилар — шубҳасиз, террорчилардир. Биз уларни айнан шундай баҳолашимиз керак, деди Путин.
У, шунингдек, Халқаро Женева конвенцияси меъёрлари Украина томонида жанг қилган хорижлик жангчиларга нисбатан татбиқ этилмаслигини айтди.
Курскдаги вазият
Россия қуролли кучлари Бош штаби раҳбари Путинга ҳисобот бериб, Курск вилоятида жанг қилаётган Украина қўшинлари қуршовга олинганини айтди.
Уларни тизимли равишда йўқ қилиш давом этмоқда, деди Герасимов.
Путин рус қўмондонларига Украина қўшинларини Курск вилоятидан имкон қадар тезроқ чиқариб юборишни буюрди.
Россия раҳбари, шунингдек, Украинанинг Курск вилояти билан чегарадош Суми вилоятида буфер зона яратиш варианти кўриб чиқилаётганини маълум қилди. Унинг сўзларига кўра, мазкур ташаббус Украина кучларининг эҳтимолий ҳужумларидан “суғурталаниш”га ёрдам беради.
Герасимовнинг айтишича, Россия армияси Курск йўналишида Украина назоратида бўлган ҳудудларнинг 86 фоизини қайтариб олган. Бу эса тахминан 1 100 квадрат километр майдонни ташкил қилади.
Бош штаб раҳбарининг даъво қилишича, Украина томони Курск вилоятини Россия билан келгусидаги музокараларда айирбошлаш учун “карта” сифатида фойдаланмоқчи бўлган, бироқ бу режа иш бермаган.
Бундан ташқари, у “Курск операцияси”дан кўзланган яна бир мақсад — “Россия қўмондонлигини Донбасс фронтидан кучларини олиб чиқишга мажбурлаш” ҳам амалга ошмаганини таъкидлади.
Қарши томон нима дейди?
Путиннинг Курск вилоятига ташрифи билан бир вақтда Украина қуролли кучлари бош қўмондони йўқотишларни камайтириш учун чекиниш буйруқ бериши мумкинлигига шама қилди.
Энг оғир вазиятда менинг устувор вазифам украиналик аскарларнинг ҳаётини сақлаб қолиш бўлган ва шундай бўлиб қолади. Шу мақсадда мудофаа кучлари бўлинмалари, агар керак бўлса, қулайроқ позицияларга манёвр қилишади, деб ёзди Александр Сирский.
Украина президенти эса Киев ўз аскарлари ҳаётини сақлан қолиш учун максимал ҳаракат қилаётганини таъкидлади.
Украина томони мазкур йўналишидаги вазиятга расман аниқлик киритмаган бўлса-да, Financial Times нашри Киев энг жанговар бригадаларни Курск вилоятидан босқичма-босқич олиб чиқаётгани ҳақида хабар берди. DeepState лойиҳаси эса интерактив харитани янгилаб, Суджа шаҳрини Украина армияси назоратидан чиқариб ташлади.
Изоҳ (0)