Шимолий Корея Россиянинг Украинага қарши урушини қўллаб-қувватлаш учун қўшимча ҳарбийлар юборди. Бу ҳақда Жанубий Корея разведкасига таяниб, Yonhap хабар берди.
Разведка маълумотларига кўра, Шимолий Корея январь ва февраль ойларида Россияга 1000 дан ортиқ ҳарбий хизматчини жўнатган. Бу Украина армиясига қарши курашиш учун аллақачон жойлаштирилган 11 мингга яқин ҳарбийга қўшимча бўлган.
Тахминан бир ой давом этган сукунатдан сўнг, Шимолий Корея қўшинлари февраль ойининг биринчи ҳафтасидан бошлаб Курскнинг олдинги чизиғига жойлаштирилди, деди Миллий разведка хизмати.
Бундан ташқари, разведка вакили Шимолий Корея Россияга яна қўшимча қўшин юборишга тайёргарлик кўраётганини маълум қилган. Россияга юборилган КХДР аскарлари январь ойининг ўрталаридан бери Курск вилоятидаги жангларда иштирок этмаяпти. Бунинг сабаби, эҳтимол, улар орасидаги йўқотишлар сонининг кўплигидадир.
Разведка ҳисоб-китобларига кўра, 300 га яқин аскар ҳалок бўлган ва 2700 га яқини яраланган.
Россия ва КХДР ҳамкорлиги
Россия ва Шимолий Корея уруш бошланганидан кейин ҳарбий соҳадаги ҳамкорликни кучайтира бошлади. 2024 йил июнь ойида Россия президенти Владимир Путин Шимолий Кореяга ташриф буюриб, Ким Чен Ин билан ҳужум содир бўлган тақдирда бир-бирини қўллаб-қувватлашни назарда тутувчи, шунингдек, Ғарб санкцияларига қарши ҳамкорликни ўз ичига олган кенг қамровли стратегик шартнома имзолади.
Украина армияси Курск вилоятида шимолий кореялик икки аскарни асирга олди. Президент Владимир Зеленский 12 январь куни улар сўроққа тутилгани акс этган видеони эълон қилди. Сўроқ пайтида КХДР аскарлари қаердалигини билмаслиги, уларга бу фақат ўқув машғулоти деб айтилганини таъкидлади.
Украина армияси бундай йўқотишларни бир қатор сабаблар билан изоҳламоқда. Жумладан, Шимолий Корея аскарлари “Иккинчи жаҳон уруши” давридаги каби пиёда ҳужум қилган ва Украина дронлари ҳамда артиллерияси учун осон нишон бўлган. Улар одатда нишонга олинсалар ҳам, ҳужумни давом эттирган.
Бундан ташқари, асирга тушмаслик учун Шимолий Корея аскарлари ўзларини гранаталар билан портлатган. Шунингдек, КХДР аскарлари тил билан боғлиқ муаммо туфайли Россия қўшинлари билан контактга яхши киришмаган. Ҳатто тасодифан Россия позицияларига ҳужум қилган. Шимолий Корея Москвани қўллаб-қувватлаш учун 100 минггача аскар беришга тайёрлигини маълум қилгани айтилмоқда.
Изоҳ (0)