Хитой ҳукумати армия ҳақидаги маълумотларни ноқонуний равишда тарқатаётган бир нечта интернет ресурсларини аниқлади. Бу ҳақда ХХР кибермакон масалалари бўйича бошқармаси хабар берди.

Назорат органи тарқатган баёнотда таъкидланишича, Хитой ижтимоий тармоқларидаги айрим саҳифалар “жамоатчиликни чалғитган, қуролли кучлар обрўсига путур етказган ва жамиятга салбий таъсир кўрсатган”. Бошқарма “қонунга мувофиқ чоралар кўриб”, зарарли маълумотларни йўқ қилган ва улар жойлаштирилган аккаунтларни ёпган.
“Жанубий гвардия”, “Бирлашган штаб таҳлил маркази хизмати” ёки “Бирлашган логистик қўллаб-қувватлаш” каби номлар остидаги айрим интернет-ресурслар ўзларини расмий манбалар сифатида кўрсатиб, обуначи ва фойда олиш мақсадида оммабоп мавзулардан фойдаланиб, ҳарбий контент тарқатган. Бошқалари эса сохта маълумотлар ва миш-мишлар тарқатиш билан шуғулланган”, дейилади баёнотда.
Бундан ташқари, назорат органи тарихни бузиб кўрсатувчи, ҳарбий хизматчиларга туҳмат қилувчи ва армияни обрўсизлантирувчи материалларни жойлаштирган аккаунтларни ҳам аниқлади. Шунингдек, идора мудофаа объектлари ҳақидаги маълумотларни ноқонуний ошкор қилган манбаларни ҳам фош этди.
Февраль ойида Хитой ўз Қуролли кучлари ҳақидаги маълумотларни интернетда эълон қилишни чекловчи янги қоидаларни жорий этганди.
Изоҳ (0)