Фарғона халқаро аэропортида 12 март куни Новосибирскдан С7-5561 рейси билан учган С7 Airlines авиакомпаниясининг Boeing 737-800 самолёти учиш-қўниш йўлагида қолиб кетди.
“Авиаторшина” Telegram каналининг ёзишича, самолёт қўнгандан сўнг, учиш-қўниш йўлагида ҳаракатланаётганда чап асосий шассидаги ташқи ғилдирак блокланиб қолган, кейин эса чиқиб кетган. Самолёт командири самолётни тўхтатиб, муҳандис-техник ходимларни чақирган. Самолётни кўздан кечириш чоғида ғилдиракни ушлаб турувчи мурватлардан бир қанчаси етишмаётгани аниқланган.
Бортда бўлган 160 нафар йўловчи учиш-қўниш йўлагига туширилиб, юклари билан бирга аэропорт терминалига етказилган ва улар авиакомпаниянинг заҳирадаги самолёти билан манзилга етказилишга қарор қилинган.
Boeing 737 самолёти эса парвоздан четлатилган ва бир неча соатдан кейин перронга олиб борилган.
“РБК” нашрининг маълум қилишича, Новосибирск транспорт прокуратураси С7 Airlines самолёти билан юз берган ҳолат юзасидан тергов бошлади. Айни пайтда мутахассислар юзага келган техник носозлик сабабларини ўрганмоқда. Авиакомпания ҳозирча вазиятга изоҳ бермади.
5 март куни Москванинг Внуково аэропортидан Тошкентга учаётган самолёт двигатели телетрап сабабли шикастланганди. Москва транспорт прокуратураси ушбу ҳодисанинг барча ҳолатларига ойдинлик киритгач, аэропорт ходимларининг хатти-ҳаракатларига ҳуқуқий баҳо бериши, асослар мавжуд бўлса, чора кўриши билдирилган.
Изоҳ (0)