Эпизодлари 60–90 сония давом этадиган ўта қисқа мини-сериаллар TikTok’да машҳур бўлиб бормоқда. Бундай лойиҳаларнинг формати жуда оддий кўриниши мумкин, аммо сериаллар профессионал режиссёрлар томонидан ишлаб чиқилмоқда. Хитойда урф бўлган бир дақиқалик мини-драмалар қизиқарли сюжет ва клиффҳенгерларга бойдир.
Клиффҳенгер (инг. cliffhanger) — бу ҳикоя, фильм, сериал ёки мақола охирида қолдириладиган кутилмаган ва ҳал қилинмаган вазият. Унинг асосий мақсади — томошабин ёки ўқувчини кейинги қисмни кутишга ундашдир.
Хусусан, 2023 йилда “Миллиардер эримнинг қўшалоқ ҳаёти” деб номланган шоу ижтимоий тармоқда энг таниқли ва катта даромад келтирган лойиҳа бўлди. Мини драмада онаси даволаш учун пулдор, аммо собиқ судланган эркакка турмушга чиқишга мажбур бўлган аёл ҳақида ҳикоя қилинади. Сериал 49 қисмдан иборат бўлиб, уларнинг ҳар бири узоғи билан бир дақиқа давом этади. Изоҳларда эса минглаб фойдаланувчилар янги эпизодни имкон қадар тезроқ жойлаштиришни сўрашади.
Бундай мини-сериаллар ҳозирда фақат Хитойда ишланмоқда. Bloomberg нашри маълумотларига кўра, 2024 йилда ана шундай қисқа драмалардан тушган даромад 35 фоизга ўсган. Шу каби контент яратувчилари 50,44 миллиард юан (6,91 миллиард доллар) ишлаб олган. Ушбу кўрсаткич кинотеатрларнинг касса даромадидан юқори ҳисобланади.
Хитойнинг ярим миллиарддан ортиқ интернет фойдаланувчилари ҳар куни бундай кўрсатувларни томоша қилади. “Миллиардер эримнинг қўшалоқ ҳаёти” фильми муаллифи, ReelShort бош директори Жои Жиа шундай дейди:
“Мен яқин келажакда мини-драмалар кўнгилочар шоулар орасида энг машҳур лойиҳа шаклига айланишига ишонаман. Фикримча, бир неча йил ичида улар анъанавий кино бозорини ортда қолдиради”.
Эпизоди бир неча секунд давом этадиган сериаллар биринчи марта Хитойда 2018 йилда пайдо бўлган ва ҳозирда мамлакат йилига 5000 дан 8000 гача янги сериалларни ишлаб чиқаради. Рақобат тобора ошиб бораётгани туфайли сериалларни яратиш харажатлари ҳам ортиб бормоқда, аммо ҳозирча бу стандарт фильмлардан камроқ харажат талаб этмоқда.
Изоҳ (0)